Ekonomi Marketing

Panairi i Energjisë, Ndërtimit dhe Ekonomisë së Gjelbër 2024 Tiranë, 20-21 nëntor, Pallati i Kongreseve

Para 3 muajve

Panairi i Energjisë, Ndërtimit dhe Ekonomisë së Gjelbër rikthehet për të tretin vit radhazi më 20 dhe 21 nëntor, në Pallatin e Kongreseve, Tiranë, duke ri-konfirmuar statusin e tij si panairi i vetëm dhe më i rëndësishëm për këto sektorë në vend.

Ky event ofron një platformë të pasur për inovacion, bashkëpunim dhe zhvillim të qëndrueshëm, duke sjellë përfitime për industritë përkatëse dhe të gjithë pjesëmarrësit.

Ceremonia e Hapjes së panairit do të zhvillohet më 20 nëntor, në orën 10:00, në hollin kryesor të Pallatit të Kongreseve, dhe do të mirëpresë personalitete me një kontribut të spikatur në tranzicionin drejt ekonomisë së gjelbër, si:

– Z. Hubert Perr, Drejtues i Delegacionit të Bashkimit Evropian në Shqipëri për Bashkëpunim

– Znj. Ekaterina Solovova, Drejtuese e EBRD në Shqipëri

– Z. Axel Olearius, Drejtor i Programit për Zhvillim Urban të Qëndrueshëm ndaj Ndryshimeve Klimatike në GIZ

dhe shumë personalitete të tjera me ndikim në sektorët e energjisë, ndërtimit dhe ekonomisë së gjelbër.

Pas ceremonisë, aktivitetet do të vazhdojnë me Tirana Energy Forum (TEF 2024), ku do të zhvillohen katër panele diskutimi me mbi 30 folës ekspertë të fushës, të moderuar nga Lorenc Gordani. Forumet do të përqendrohen te çështje si tranzicioni energjetik në Shqipëri, roli i biznesit të qëndrueshëm, zbatimi i Agjendës së Gjelbër dhe zhvillimi më i fundit i projekteve të energjisë së rinovueshme, efiçenca në ndërtim, si dhe përmirësimi i sistemeve të rrjetit dhe përparime të tjera të spikatura në tregun shqiptar të energjisë.

Një moment i veçantë do të jetë paneli i dedikuar të rinjve, duke trajtuar aksesin e tyre në tregun e punës për sektorin e energjisë dhe ndërtimit, dhe duke adresuar nevojat për punonjës të kualifikuar. Forumi ofron një mundësi të shkëlqyer për intervista ekskluzive me ekspertë ndërkombëtarë të fushës.

Eksperienca ekskluzive për mediat

Intervista Ekskluzive: Mundësi për të intervistuar ekspertë ndërkombëtarë dhe liderë të industrisë.

Prezantim Inovacionesh: Prezantime të teknologjive më të reja dhe zgjidhjeve inovative nga kompani lidere në treg.

Lançime Ekskluzive: Zbuloni projekte të reja dhe iniciativat më të fundit në sektorët e energjisë dhe ndërtimit.

Një platformë për zhvillim të qëndrueshëm

Panairi do të mundësojë ndërveprim të drejtpërdrejtë mes prodhuesve, furnizuesve dhe konsumatorëve të teknologjive më inovative, duke nxitur bashkëpunime të reja dhe duke i dhënë formë të ardhmes së qëndrueshme për industrinë në Shqipëri dhe rajon.

Profili i ekspozuesve dhe vizitorëve

Panairi ka tërhequr një grup të larmishëm ekspozuesish nga sektorë të ndryshëm, përfshirë prodhues të energjisë, ofrues të teknologjisë, kompani ndërtimi dhe të tjerë. Kategoria e vizitorëve përfshin sipërmarrës, menaxherë biznesesh, operatorë energjetikë, zhvillues, investitorë dhe zyrtarë qeveritarë, të gjithë të interesuar për të investuar dhe për të zgjeruar njohuritë e tyre në fushën e efiçencës energjetike dhe praktikave të qëndrueshme.

Ndërsa, mbështetësit kryesorë të këtij panairi janë: Longi- Global Power, VEGA Group, INTESA SANPAOLO BANK, VEGA CHARGING, Meps Albania, Vicatulic, Pam Building, ProCredit Bank.

Pjesëmarrja në këtë event premton shumë ndaj mos mungoni t’i bashkoheni eventit më të madh në vend kushtuar energjisë, ndërtimit dhe ekonomisë së gjelbër. Më 20 dhe 21 nëntor në Pallatin e Kongreseve.