Pamjet shqetësuese të MVP-së së NBA: Është gjysma e fytyrës së tij e paralizuar?

MVP i vitit të kaluar i NBA, Joel Embiid, pas një pauze dy mujore për shkak të lëndimit, u rikthye në kohë për play-off-in dhe në transmetimin e ndeshjes ndërmjet Philadelphia 76ers dhe New York Knicks (101:104), u vu re në disa raste se ai nuk i mbyllte fare syrin e majtë.

Domethënë, sa herë që kamera fokusohej tek ai, qoftë kur bënte gjuajtje të lira, qoftë kur ishte i shtrirë në dysheme, syri i tij i majtë ishte vazhdimisht i hapur, ndërsa syri i djathtë pulsonte normalisht.

Madje në një moment ai ngriti sytë, por vetëm ana e djathtë e ballit iu rrudh, duke shkaktuar dyshimin se e gjithë ana e fytyrës i ishte paralizuar.

Gjatë intervistës në dhomat e zhveshjes, ai ka mbajtur kokën ulur dhe ka mbuluar fytyrën me duar dhe në rrjetet sociale kanë gjetur shpejt situatën kur është goditur pa dashje nga shoku i skuadrës, Kelly Oubre Jr.

Embiid u fotografua me syze dielli në palestër një ditë më vonë në stërvitjen e mëngjesit, gjë që sugjeron ndjeshmërinë e syve, por vetëm shfaqja në praktikë është një shenjë e mirë se nuk është një lëndim më serioz.

Meqë ra fjala, mediat botërore shfaqin mendimin e doktor Brian Sutterer, i cili beson se është dëmtimi i nervit që merr komandën e ndezjes nga truri dhe një teori tjetër tregon për paralizën e Bellit të shkaktuar nga një infeksion. /Telegrafi/