Organizatat e bizneseve në Prizren i bashkohen thirrjes për kujdes me çmimet në sezonin veror

Përfaqësues të organizatave që përfaqësojnë bizneset dhe zejtarët në Prizren i janë bashkuar thirrjes së kryetarit të Komunës së Prizrenit për korrektësi në çmimet e hotelierisë dhe në shërbimet tjera në raport me vizitorët dhe turistët gjatë sezonit veror.

Sipas tyre, Prizreni duhet ta ruaj namin që gëzon në mikpritje dhe ofrim të shërbimeve cilësore për çmime të arsyeshme, raporton Telegrafi.

Varis Xhejlani nga Shoqata “Esnaf” ka bërë thirrje për kujdes në këtë drejtim në mënyrë që të ruhet tradita e kamotshme e esnafëve të qytetit të vjetër.

“Ftoj të gjithë ndërmarrësit që konform kodit të mirësjelljes, kulturës dhe traditës së esnafëve të qytetit, ti kushtojnë kujdes të shtuar rregullave të mirësjelljes dhe të mos jenë akterë të veprimeve që seriozisht dëmtojnë imazhin dhe prestigjin e Prizrenit”, ka thënë Xhejlani.

Ilir Shala që përfaqëson komunitetin e gastronomëve në Prizren ka kërkuar që çmimet të jenë konform shërbimeve që ofrohen.

“Ftojmë kolegët tanë gastronomë si dhe bizneset që veprojnë në zonën historike, si parkingjet, hotelet, etj ti përmbahen cmimeve konform shërbimeve që ofrojnë, si dhe traditës shume vjecare në kulturën e të shërbyerit me korrektësi”, është shprehur Shala, raporton Telegrafi.

Ndërsa Afrim Tejeci nga Oda e Prizrenit ka theksuar se fal traditës së ndërmarrësisë e zejtarisë Prizreni është ndër qytetet më të vizituara në Kosovë. “Prandaj s’duhet të lejohet që asnjë biznes apo individ ta prish imazhin e Prizrenit. Bashkë duhet ta ruajmë traditën e mikpritjes në Prizren”, ka thënë ai.

Kryetari i Komunës së Prizrenit, Shaqir Totaj ditë më parë ka pritur përfaqësuesit e organizatave të bizneseve që veprojnë në Komunën e Prizrenit, për të diskutuar lidhur me praktikat e ngritjes së çmimeve në hotelieri dhe në fushën e shërbimeve gjatë sezonit veror. Ai pat shprehur qëndrimin se loja me çmime nuk sjellë dobi afatgjata dhe se mund të ndikojë negativisht në përvojën e vizitorëve dhe në imazhin e qytetit. /Telegrafi/