Sport Futboll Kosovë

Objektivat e klubit, pengesa e ndeshjeve si vendas dhe prurjet e reja – trajneri i Fushë Kosovës i tregon të gjitha

Të inkuadruar pas nëntë vitesh në elitën e futbollit kosovar, Fushë Kosova ka filluar të shkaktojë probleme për ekipet e mëdha.

Kjo falë punës së palodhshme që po bënë trajneri i Fushë Kosovës, Burim Shala, i cili ka arritur të krijojë një formacion ku sinkronizohet në mënyrën më të mirë të mundshme përvoja dhe talenti i lojtarëve të rinj.

Për rezultatet e Fushë Kosovës, objektivat e klubit dhe shumëçka tjetër është prononcuar në një intervistë për Telegrafin, trajneri i “Pampurave” Burim Shala.

Sa i përket rezultateve të ekipit në ndeshjet e fundit, Shala u shpreh i lumtur me paraqitjen e lojtarëve të tij, pë faktin që u larguan nga zona e rënies.

“Po, në tri ndeshjet e fundit jam shumë i kënaqur me performancën e lojtarëve e po ashtu edhe me pikët e fituara sepse arritëm që të ikim nga fundi i tabelës dhe të zvogëlojmë diferencën e pikëve me ekipet që janë jashtë zonës së rënies nga liga”, u shpreh fillimisht Shala.

Tutje, ai foli për objektivat e klubit ku u shpreh i sigurt se ekipi që udhëheq në fund do të arrijë të siguroj mbijetesën në elitë.

“Ne besojmë në punën tonë dhe në grupin që kemi, andaj jam shumë i sigurt që në fund ne do t’ia dalim të jemi pjesë e Superligës edhe vitin e ardhshëm”, vazhdoi Shala.

Fushë Kosova momentalisht numëron dhjetë pikë pas javës së 13-të dhe kur Shala u pyet se si e parashikon gjendjen e ekipit të tij në fund të sezonit vjeshtor, ai pati një përgjigje.

“Ne do të luftojmë që ta nxjerrim maksimumin në këto ndeshjet e mbetura, por duke pasur parasysh startin jo të mirë do të isha i kënaqur nëse arrijmë të marrim 20 pikë”, deklaroi Shala.

Për shkak të kushteve jo të mira në terrenin ku Fushë Kosova zhvillonte ndeshjet si vendas, Federata e Futbollit të Kosovës mori vendim që ata të zhvillojnë ndeshjet si nikoqir në stadiumin “Sami Kelmendi” në Lipjan.

Për këtë është shprehur i pakënaqur Shala, i cili tha se po u mungojnë tifozët e klubit dhe kjo po ndikon direkt në rezultatet e tyre.

“Ndeshjet si vendas nuk i luajmë në shtëpinë tonë dhe kjo është mjaft e vështirë sepse do të ishte shumë më e lehtë po të luanim në qytetin tonë para tifozëve tanë të zjarrtë dhe jam shumë i sigurt që edhe me pikë do të ishim shumë më mirë”, u përgjigj Shala.

Në ndeshjen e parë të zhvilluar ndaj Dritës në Lipjan, Fushë Kosova shkaktoi befasi duke marrë një barazim. Tekniku i Fushë Kosovës shprehet optimist se mund të dalin me rezultat pozitiv edhe nga përballja e dytë.

“Pa marrë parasysh formën e Dritës në ndeshjet e fundit, ata kanë një ekip shumë të mirë por ne do të përgatitemi maksimalisht për këtë takim dhe do ta analizojmë kundërshtarin në detaje dhe do të udhëtojmë për rezultat pozitiv. Kuptohet që për ne pozitive është edhe barazimi”, u shpreh ai.

Në fund, Shala tha se ekipi që drejton do të jetë aktiv në afatin kalimtar të janarit ku pritet të bëjnë disa transferime për të përforcuar skuadrën.

“Ndërhyrja në afatin kalimtar është shume e nevojshme dhe normalisht që ne do të ndërhyjmë patjetër pasi tani e kemi më të lehtë të tregohemi më të saktë rreth profilit të lojtarit që na duhet dhe që ne e kërkojmë”, përfundoi Shala.