“Nuk jam unë deputetja e mëditjeve”, “Qortimet i bëj kur ja teproni, siç bëtë ju dje”- Reshitaj e Konjufca përplasen në Kuvend

Deputetja e Kuvendit të Kosovës, Albena Reshitaj i është përgjigjur sot në seancë kryeparlamentarit Glauk Konjufca, i cili dje pas përfundimit të seancës kërkoj që deputetes Reshitaj të mos i jepet mëditja, pasi sipas tij ajo qëndroi vetëm 10 sekonda në seancë.

“Dje emri im u lakua nëpër media e portale nga një deklaratë emocionale dhe aspak e hijshme nga ana e kryeparlamentarit duke mbyll seancën me një të pavërtetë të thënë që unë paskam qëndruar disa sekonda në Kuvend. Gjithashtu z.Konjufca për disa deputetë të opozitës që qëndruan aq sa unë edhe më pak kohë në Kuvend, sikur nuk i paskan penguar ose gjithë mllefin që kishte nga pamundësia për të koordinuar dhe bërë funksional seancën vendosi ta derdhte mbi emrin tim dhe mbi mua”, tha Reshitaj.

Deputetja shtoi se ajo asnjëherë nuk ka marrë mëditje nga Kuvendi dhe se vendos vet se a të qëndroj apo jo në seancë.

Lexo po ashtu “Qëndroi vetëm 10 sekonda në seancë, administrata mos t'i jap asnjë mëditje”– Konjufca tregohet i ashpër me deputeten Albena Reshitaj

“Z.Konjufca unë jam deputete në mandatin e dytë dhe unë vendos politikisht për vendimet se a të qëndroj dhe kur të qëndroj në seancë. Nuk e kuptoj këtë instalim të lidhshmërisë mes prezencës së deputetit në seancë dhe mëditjes. Është një defekt një anamoli. Nuk jam unë deputetja e mëditjeve, as për mëditje as për rrogë nuk vi në këtë Kuvend. Unë jam këtu për popullin, për qytetarët që më kanë votuar.

Nuk ke të drejtë të më ofendosh publikisht. Unë nuk marr mëditje, për dy mandate vetëm njëherë jam përkrahur nga Kuvendi kur kam qenë jashtë vendit”, tha Reshitaj.

Ajo në fund tha se shpreson që kryeparlamentari Konjufca të reflektoj dhe të tërhiqet nga deklarata që bëri ndaj saj.

Ndërkaq Konjufca tha se deputetja në fjalë “ia teproi dje”.

“Ju më njihni mirë dhe e dini shumë mirë se shumë rrallë bëjë qortime publike të deputetëve, por ato i bëjë vetëm kur ja teprojnë siç bëtë ju dje”, tha Konjufca. /Telegrafi/