Nuk është Majlinda Kelmendi, por kjo sportiste merr ftesën për Olimpiadë

Urata Rama është sportistja e parë që ka marrë ftesë për të përfaqësuar Kosovën në Lojërat Olimpike “Rio 2016”.

Shenjëtarja ka marrë pëlqimin e Komisionit trepalësh të Komitetit Olimpik Ndërkombëtar (IOC) dhe në Rio do të udhëtojë së bashku me pjesën tjetër të ekipit olimpik, që shpresohet të jetë së paku me shtatë sportistë, e në rastin më të mirë me 10, shkruan kohaditore.

Ftesën për Ramën e kanë konfirmuar kryetari i Federatës së Shenjëtarisë Sportive të Kosovës (FSHSK), Ali Pllana, dhe kryetari i Komitetit Olimpik të Kosovës (KOK), Besim Hasani.

Kosova ka dy norma të siguruara përmes xhudisteve Majlinda Kelmendi e Nora Gjakova. Po ashtu ka katër ftesa të garantuara nga noti dhe atletika dhe ftesa për Ramën mund të jetë e fundit për Kosovën, ndonëse zyrtarë të KOK-ut shpresojnë që të marrin edhe një të paktën – për xhudisten Distria Krasniqi, nëse jo edhe dy të tjera për pingponistë,t Linor Çitaku e Fjona Çitaku, që më herët morën një çmim për ‘Fair Play’ nga federata ndërkombëtare e këtij sporti.