Sport Sporte tjera

Njihuni me Lara Colturin, garuesen e Shqipërisë e njohur si ylli i ri i qiellit të skive

Para 1 muaji

Lara Colturi, skiatorja 18-vjeçare që garon për Shqipërinë dhe me rezultatet e saj tregon talent dhe potencial të madh, bëri bujë në garën e fundit në Austri, duke fituar medaljen e argjendtë.

Lara ka lindur më 18 nëntor 2006 dhe së fundmi ka festuar ditëlindjen e saj të 18-të. Ajo ka lindur në Torino të Italisë dhe është rritur në Cesana Torinese në rajonin e Piemontes, i rrethuar nga Alpet.

Si vajzë, ajo hyri në botën e skijimit dhe me vendosmëri u nis në rrugën drejt famës botërore. Skitë janë qartazi në gjenet e saj, pasi nëna e saj është ish-kampionia olimpike Daniela Ceccarelli, fitoi një medalje të artë në super-G në Lojërat Olimpike Dimërore të vitit 2002 të mbajtura në Salt Lake City.

Babai i Larës, Alessandro Colturi, është një trajner skish, kështu që nuk është çudi që ajo ra shpejt në dashuri me shpatet me borë dhe filloi të garonte në pista anembanë botës.

Duke ndjekur gjurmët e heronjve të saj, Lara vendosi të konkurrojë në Kupën e Amerikës së Jugut, ku tregoi talent të jashtëzakonshëm dhe fitoi gjashtë gara të zhvilluara në Kili dhe Argjentinë, duke i dhënë asaj titullin e fitueses së përgjithshme. Falë këtij suksesi, ajo fitoi pikë të mjaftueshme për t’u kualifikuar në Kupën e Botës FIS.

Edhe pse ka lindur në Itali, Lara përfaqëson Shqipërinë. Ajo bëri debutimin e saj në Kupën Botërore të Skive Alpine më 22 tetor 2022 në Sölden zyrtarisht si një 15-vjeçare, duke e bërë atë skiatoren e parë femër që përfaqëson Shqipërinë në historinë e vet.

Ajo garoi për herë të parë në sllallomin e Kupës së Botës më 19 nëntor 2022 në Levi të Finlandës, ku nuk arriti në vrapimin e dytë. Megjithatë, javën e ardhshme ajo shënoi pikët e saj të para në Kupën e Botës në sllallomin gjigand të mbajtur në Killington, SHBA, ku përfundoi e 17-ta vetëm disa ditë pas ditëlindjes së saj të 16-të.

Vetëm dy muaj më vonë, Colturi konkurroi në Kampionatin Botëror të Juniorëve Alpine FIS dhe fitoi një medalje bronzi në sllallomin gjigant. Por, kjo nuk është e gjitha, sepse ajo arriti të fitojë sllallomin e madh dhe kështu u bë fituesja më e re e një medalje ari në kampionat.

“Gjatë vitit tim të parë, pra në garat e para, ende nuk mund ta besoja se po garoja me skiatore të njohura si Mikaela Shiffrin dhe Petra Vlhova, si dhe skiatore të tjerë që më parë i kisha parë vetëm në televizor. Ishte e mrekullueshme të stërvitesha dhe bisedoja me ta, shkëmbeja këshilla, megjithatë duhet të pranoj se ndjeva tension për shkak të emrave të mëdhenj si Shiffrin, por tani jam shumë më e qetë dhe kam më shumë besim”, ka thënë Colturi në një intervistë për faqen zyrtare të Komitetit Olimpik Ndërkombëtar, transmeton Telegrafi.

Pasi përfundoi tre herë në top 20, në shkurt të vitit 2023 ajo dëmtoi gjurin e saj, i cili kërkoi operacion.

“Ajo periudhë më ndihmoi të piqesha si person. Kuptova se duhet të punoj shumë më tepër për veten time, për të kuptuar më mirë trupin tim dhe atë që kam nevojë”, shtoi Lara.

Pas një rikuperimi të suksesshëm, ajo u kthye në garat e Kupës së Botës më 28 tetor 2023, me një performancë në sllallomin gjigand të mbajtur në Sölden. Në sezonin e kaluar, ajo vazhdoi suksesin e saj dhe katër herë ishte në top 15-she, dhe veçohet vendi i nëntë në Flachau të Austrisë.

“Më duhet sezoni i parë për të zbuluar shpate të reja, shtigje dhe vende të reja. Po eksploroj pak këtë botë të Kupës së Botës. Tani i njoh pothuajse të gjitha mjaft mirë, kryesisht ato teknike”, theksoi skiatorja e re, përcjell Telegrafi.

Ajo po i shmang garat e shpejta këtë sezon dhe strategjia e saj duket se po funksionon. Në hapjen e Kupës së Botës në Sölden, ajo përfundoi e 16-ta, gjë që ishte inkurajuese.

“Ndihem mjaft mirë në sllallomin gjigand dhe sllallom. Vitin e kaluar vumë re se ndihesha mirë në stërvitje, por që po luftoja për të siguruar të njëjtën performancë në gara. U ndjeva shumë mirë në Sölden, jam e kënaqur me veten dhe skijimin tim”.

Se Lara e re është vërtet në rrugën e duhur, tregon edhe rezultati i saj nga Gürgl të Austrisë, ku fitoi vendin e dytë në sllallom më 23 nëntor 2024, menjëherë pas fitueses Shiffrin. Ishte podiumi i saj i parë në karrierën e saj në Kupën e Botës, po ashtu historike për Shqipërinë.

“Më pëlqen të bëj ski këtu. Jam shumë e lumtur për këtë rezultat. U ndjeva mjaft mirë në stërvitje ditët e fundit, u stërvita me Henrik Kristoffersen dhe djem të tjerë”, tha Colturi pas suksesit të saj të madh.

Ëndrra e saj është që një ditë të arrijë suksesin e nënës së saj Daniela dhe të fitojë një medalje të artë në Lojërat Olimpike Dimërore.

“Qëllimi është të vazhdoj të përmirësohet teknikisht, çdo sportist përpiqet për perfeksionin ose të paktën të jetë sa më afër tij. Por, në fund të fundit, synimi im është të argëtohem sa më shumë, ky është prioriteti”, përfundoi përfaqësuesja e Shqipërisë. /Telegrafi/