Njerëz të armatosur vrasin 13 policë në Meksikë – gjithçka ndodhi në një pritë, në mes të ditës

Njerëz të armatosur vranë të paktën 13 policë meksikanë në një pritë në një distancë të shkurtër jashtë kryeqytetit të enjten, thanë autoritetet lokale, në një nga vrasjet më të rënda të forcave të sigurisë në këtë vend.

Sipas Reuters, përcjell Telegrafi, imazhet nga skenat e tmerrshme qarkulluan në mediat sociale që tregojnë një makinë policie të mbushur me plumba dhe një kamion, së bashku me trupat e oficerëve të shpërndarë përgjatë rrugës ose akoma brenda makinës.

#AlertaADN | La Fiscalía del #Edomex informó que un grupo de la delincuencia organizada emboscó a policías que realizaban labores de patrullaje. #EsTendencia con @joseluismorag | https://t.co/tDZLlPeMJQ pic.twitter.com/ocVe0tcz2G

— adn40 (@adn40) March 18, 2021

Siç bëhet e ditur, karvani i personelit të sigurisë u sulmua në mes të ditës nga anëtarët e dyshuar të bandës në zonën Llano Grande në komunën e Coatepec Harinas ndërsa po kontrollonte zonën, tha Rodrigo Martinez-Celis, ministri i sigurisë për Shtetin e Meksikës.

Tetë nga oficerët e vrarë ishin polici e shtetit, ndërsa pesë të tjerë ishin policë të caktuar në zyrën e prokurorit të shtetit.

Zona është në jugperëndim të Mexico City dhe rreth 40 milje (64 km) në jug të qytetit të Toluca, kryeqyteti i shtetit të populluar të Meksikës, i cili rrethon pjesën më të madhe të kryeqytetit.

“Ky sulm është një fyerje për shtetin meksikan. Ne do të përgjigjemi me të gjithë forcën dhe mbështetjen e ligjit”, ka thënë ministri në një fjalim për mediat.

Ndërkohë bëhet e ditur se policia e Gardës Kombëtare dhe forcat e armatosura po kërkojnë autorët nga toka dhe ajri.

Sidoqoftë është ende e paqartë se sa kriminelë të dyshuar u vranë ose u plagosën në incident, ose nëse në grupin e tyre kishte të përfshirë pjesëtarë të ndonjë prej karteleve kryesore të drogës në vend. /Telegrafi/