Një delegacion nga Republika Serbe e Bosnjës priten me duartrokitje në Dumën ruse – përgjigjen duke ngritur tre gishtat

Ndonëse e gjithë bota po shmang vizitat në Moskë për shkak të agresionit rus në Ukrainë, një delegacion i Republikës Serbe në Bosnjë dhe Hercegovinë, përveçse ka bërë një gjë të tillë, madje edhe janë mburrur me këtë.

Sipas mediave të huaja, përcjell Telegrafi, bëhet fjalë për një vizitë të një delegacioni të Asamblesë Kombëtare të Republikës Serbe, të kryesuar nga kryetari i këtij institucioni, Nenad Stevandiq, në një seancë të Dumës së Rusisë.

Siç thuhet më tej, në seancën e Dumës, delegacioni në fjalë u prit me duartrokitje të forta.

Mirëpritja u transmetua publikisht, ndaj në rrjetet sociale mund të gjendet pamje ku shihen deputetët duke bërë me dorë dhe duke ngritur tre gishtat.

Doček parlamentaraca iz Republike Srpske u Državnoj dumi Rusije. pic.twitter.com/vz3yxfNaG0

— Zoran Šarenac (@sarenaczoran) February 22, 2023

Pas kësaj ata thuhet se kanë zhvilluar një takim me presidentin e Dumës, Vjecheslav Viktorovich Volodin.

Ndër tjerash, delegacioni nga Republika Serbe theksohet se ka biseduar me delegacionet ruse për “marrëdhëniet ndërmjet RS-së dhe Rusisë, bashkëpunimin e deritanishëm dhe vazhdimin e realizimit të projekteve”.

Ata “konstatuan se kanë marrëdhënie të shkëlqyera dhe se nuk ka çështje të diskutueshme midis BeH dhe Rusisë” ku është përsëritur se “RS mbetet neutrale kur bëhet fjalë për luftën në Ukrainë, por është e qartë se nuk mund të flasin në emër të Bosnjë-Hercegovinës”. /Telegrafi/