“Ngrite kokën lart!”, Gjirafa me kampanjë motivuese në përmbyllje të vitit pandemik

Platforma Gjirafa ka realizuar një kampanjë të veçantë këtë fundvit.

Bëhet fjalë për një video motivuese, e cila është realizuar me qëllim sensibilizimin e shqiptarëve me situatën e shkaktuar këtë vit nga pandemia globale COVID-19.

Hapësirë e veçantë u është dhënë punëtorëve shëndetësore të vijës së parë të frontit dhe policëve, të cilët absolutisht kanë bërë punën më të madhe gjatë vitit.

Koncepti i videos përqendrohet në durimin, duke përçuar mesazhin se “jemi të gjithë në këtë situatë së bashku”, dhe se “do ta kalojmë bashkë këtë sfidë”.

Storja përmbyllet me improvizimin e një ribashkimi të familjes, ku kryefamiljari në krye të detyrës, takon më të dashurit e tij pasi gjithçka ka përfunduar.

“Ngrite kokën lart! Kjo është për ju që nuk u ndalët në asnjë moment pavarësisht vështirësive, vuajtjeve e sakrificave gjatë këtij viti. Kjo është për ju që dashuroni, për ju që shpresoni, për ju që refuzoni të rrëzoheni. Kjo është për ju që edhe në vështirësi qëndruat me kokë lart. Kjo është për të gjithë ne. Sepse vetëm të bashkuar do t’ia dalim”, shkruan Platforma Gjirafa në videon e shpërndarë në rrjetin social Facebook.

Kampanja është shpërndarë gjithandej në rrjetet sociale, madje edhe nga shumë figura publike, përfshirë këtu u.d së presidentes së Kosovës, Vjosa Osmani. /Telegrafi/