Hailey Bieber ka vendosur ta shënojë fundin e vitit me një ndryshim imazhi
Viti 2025 ka qenë jashtëzakonisht i rëndësishëm për Hailey Bieber, si në aspektin profesional, ashtu edhe në rolin e saj si përcaktuese e trendeve në botën e bukurisë. Si hap përmbyllës i këtij kapitulli, modelja i ka thënë lamtumirë flokëve të gjatë që i mbante muajt e fundit dhe ka zgjedhur frizurën e njohur si lob.
Bëhet fjalë për një gjatësi që prek supet, duke zëvendësuar flokët ultra të gjatë dhe të lëmuar me një formë më të ajrosur, moderne dhe të përcaktuar me saktësi. Frizura e re reflekton elegancë të thjeshtë dhe freski vizuale.
Për pamjen e re është përkujdesur stilistja e njohur Justine Marjan. Frizura karakterizohet nga një nuancë natyrale, intensive kafe dhe ndarje në mes. Sa i përket stilizimit, Hailey ka zgjedhur një fenirim të butë, me maja lehtësisht të përdredhura nga jashtë, një detaj diskret që i jep fytyrës butësi dhe një notë të lehtë retro. Me shkurtimin e flokëve për më shumë se dhjetë centimetra, ajo ka arritur një pamje që duket e rregullt, e kuruar dhe bashkëkohore, transmeton Telegrafi.
Rikthim te format më të shkurtra pas një viti të suksesshëm
Kjo nuk është hera e parë që Hailey Bieber i kthehet frizurave më të shkurtra, veçanërisht gjatë sezonit dimëror; një bob i ngjashëm, pak më i shkurtër, e ka shoqëruar edhe në fillim të vitit 2023. Këtë herë, ndryshimi vjen pas një serie suksesesh të rëndësishme profesionale, përfshirë partneritetin strategjik të markës Rhode me kompaninë e.l.f. Cosmetics, si dhe vlerësime prestigjioze nga industria e bukurisë.
Krahas stilit të ri të flokëve, Bieber ka ruajtur estetikën e saj karakteristike në makeup: skuqje rozë në faqe, bronzer me ton të ngrohtë dhe buzë në një nuancë rozë-vjollcë më të thellë, të kombinuara me manikirin e saj tashmë ikonik me efekt “glazurë” nude. Me këtë transformim, ajo dëshmon edhe një herë se thjeshtësia dhe format klasike mbeten zgjedhja më e sigurt për një hyrje elegante dhe të freskët në sezonin e ri. /Telegrafi/
