Kryeministri izraelit Benjamin Netanyahu dërgoi një mesazh me rastin e vrasjes së aktivistit amerikan të krahut të djathtë Charlie Kirk, duke theksuar se pretendimet për përfshirjen e Izraelit në këtë krim janë "një gënjeshtër monstruoze dhe pa kuptim".
Në një video-adresim të postuar në X, Netanyahu kujtoi fjalët e ministrit nazist të propagandës Joseph Goebbels:
"Goebbels thoshte se sa më e madhe gënjeshtra, aq më shpejt përhapet. Tani dikush ka shpikur një gënjeshtër të madhe monstruoze, se Izraeli kishte të bënte me vrasjen e tmerrshme të Charlie Kirk. Kjo është çmenduri. Është gënjeshtër. Është e turpshme."
Kryeministri theksoi se Kirk ishte ndër miqtë më të përkushtuar të Izraelit në skenën politike amerikane.
“Charlie gjithmonë qëndroi në krah të Izraelit. Ne folëm shumë herë dhe kohët e fundit e ftova të vizitonte Izraelin. Edhe kur ai kishte kundërshtime ose shprehu mendime të ndryshme, e dija që vinte nga zemra - nga dashuria e tij për Izraelin dhe popullin hebre. Ky ishte Charlie, ky është thelbi i një vendi të lirë”, tha Netanyahu.
Ai shtoi se po përhapen “thashetheme të neveritshme” dhe sugjeroi se ato mund të nxiten nga ata që kanë një obsesion ose edhe mbështetje financiare nga Katari, ndërsa bashkëpunëtorët e tij më të ngushtë përballen me kritika për pagesa të supozuara nga Katari.
“Charlie meriton nder, jo gënjeshtra”, përfundoi Netanyahu, duke theksuar se Izraeli do të vazhdojë ta çmojë kujtimin e aktivistit amerikan si një avokat të sinqertë dhe të pasionuar për popullin izraelit. /Telegrafi/
