Nesër fillon faza e dytë e lehtësimit të masava nga pandemia, këto janë bizneset që rihapen

Në vendin tonë nesër nis faza e dytë e lirimit të masave nga pandemia COVID-19, që do të thotë hapje më të madhe të ekonomisë dhe rrjedhimisht edhe lëvizje të shtuar të qytetarëve.

Sipas Qeverisë në detyrë, do të rihapen floktarët dhe sallonet e ondulimit, stomatologët dhe fizioterapeutët, tregtarët me pakicë dhe tregu i gjelbër, gastronomia (merre me vete), transporti hekurudhor, transporti urban dhe ndër-urban (me leje të veçanta), qendrat e thirrjeve telefonike (me lista të stafit esencial), si dhe hapja e galerive dhe muzeve.

Gjithashtu, do të lejohet dalja dy herë në ditë nga dy orë, sipas shifrës së parafundit në numrin personal të letërnjoftimit.

Kryeministri në detyrë, Albin Kurti ka thënë të enjten se çdo lëvizje është e arsyeshme vetëm nëse është e domosdoshme.

“Me kujdes të shtuar të vazhdojmë të mbajmë distancën, të vendosim maska fytyrës e të ruajmë pastërtinë. Përndryshe, duhet t’i rikthejmë masat rigoroze sepse do të na rikthehet vala e pandemisë së virusit corona. Por, bashkë, ama vetëm bashkë, do të fitojmë”, ka thënë ai. /Telegrafi/