Ndërtimtaria dhe prodhimet e drurit kosovar në qendër të “SWISS BAU 2024” – Qeveria premton mbështetje për prodhuesit

Panairi Ndërkombëtar “SWISS BAU 2024”, në Basel të Zvicrës hapi dyert dje për vizitorë, ku kompanitë kosovare po ekspozojnë prodhimet e tyre të drurit dhe ndërtimtarisë.

Në hapje të këtij panairi mori pjesë kryeministri Albin Kurti dhe ministrja e Industrisë, Ndërmarrësisë dhe Tregtisë, Rozeta Hajdari, të cilët tek bizneset vendore theksuan përkushtimin e Qeverisë së Kosovës për mbështetjen e sektorit privat në veçanti për prodhuesit me potencial eksporti.

“Kryeministri Kurti, me këtë rast tha se progresi në demokraci dhe qeverisje dhe stabiliteti institucional kanë reflektuar me rritje të dukshme të eksporteve dhe me investime të huaja.
Ndërkaq Ministrja Hajdari, theksoi se industria e drurit është njëri ndër sektorët strategjik për zhvillimin ekonomik të Republikës së Kosovës sepse ka potencial për të rritur përfitimet e brendshme nga përdorimi i resurseve vendore dhe është ndër të vetmit sektorë industrial që kanë kontribut pozitiv në rritjen e inovacionit dhe uljen e deficitit tregtar”, thuhet në njoftim.

Kurti dhe Hajdari, duke vlerësuar lartë kontributin e vazhdueshëm të diasporës, bënë thirrje që investimet e tyre potenciale t’i orientojnë në Kosovë, duke i siguruar ata për mundësitë dhe përparësitë që ofrohen përmes reformave të ndërmarra nga Qeveria, të cilat mbrojnë dhe trajtojnë barabartë investimet e diasporës dhe ato të huaja.

Panairi Swiss Bau do të mbahet deri me 19 Janar 2023 në Messeplatz, Hall 1.1, Booth no. A60, B60 dhe A90, Basel, Zvicër, ku 12 kompani vendore të mbështetura nga Agjencia për Investime dhe Përkrahjen e Ndërmarrjeve në Kosovë (KIESA) po ekspozojnë produktet e tyre. /Telegrafi/