Ndërron jetë George Young, kantautori dhe producenti i The Easybeats dhe AC/DC

Kantautori pionier australian, George Young, ka vdekur në moshë 70 vjeçare.

George, i cili është vëllai i Angus dhe Malcolm Young të “AC/DC”, lindi në Skoci (1946) dhe së bashku me familjen migroi në Australi.

Ai ka qenë fillimisht anëtar i bendit australian, “The Easybeats” (1964-1969) dhe është bashkëshkrues i hitit të tyre, “Friday On My Mind”.

https://www.youtube.com/watch?v=rBJLoYd8xak

Pas ndarjes së grupit, së bashku me Harry Vandan ai vazhdoi të prodhonte disa hite dhe asokohe u bënë kantautorët më të njohur në Australi.

Ata realizuan edhe hitet “Love Is In The Air” e “Yesterday’s Hero” për John Paul Young.

Njëherësh vazhduan të bashkëpunonin me legjendarët e “AC/DC”, ku ishin anëtarë dy vëllezërit e Young.

Në një komunikatë të lëshuar nga “AC/DC” thuhet se grupi nuk do të ekzistonte pa ndihmën dhe orientimin e George.

“Si muzikant, kantautor, producent, këshilltar dhe shumë, shumë më tepër, nuk do të mund të kërkonit një njeri më të përkushtuar se ai”.

“Nuk mund të gjeje një vëlla më të mirë. Gjithmonë do ta kujtojmë me mirënjohje dhe do ta mbajmë pranë zemrave tona”, thuhet në komunikatë. /Telegrafi/