NATO refuzon krijimin e zonës së ndalim-fluturimit mbi Ukrainë, Zelensky i pakënaqur vlerëson se kjo do të thotë më shumë bombardime

Ministrat e Jashtëm të NATO-s të premten (4 mars) thanë se nuk do të krijonin një zonë ndalim-fluturimi mbi Ukrainë ose nuk do të përfshinin trupat e tyre në ndonjë ndërhyrje atje, por premtuan ndihmë të tjera për Kievin.

“Aleatët bien dakord se nuk duhet të kemi aeroplanë të NATO-s që veprojnë në hapësirën ajrore të Ukrainës ose trupa të NATO-s në territorin e Ukrainës”, tha sekretari i përgjithshëm i NATO-s, Jens Stoltenberg pas takimit, përcjell Telegrafi.

Dhe lidhur me këtë ka ardhur edhe reagimi i presidentit ukrainas, Volodymyr Zelensky, shkruan Reuters, përcjell Telegrafi.

Lexo po ashtu Zelensky: Mos heshtni - sepse nëse Ukraina nuk mbijeton, e gjithë Evropa nuk do të mbijetojë

“Sot pati një samit të NATO-s, një samit të dobët, një samit ku ishte e qartë se jo të gjithë e konsiderojnë betejën për lirinë e Evropës si qëllimin numër një”, tha Zelenskiy në një fjalim televiziv të premten vonë.

“Sot, lidershipi i aleancës dha dritën jeshile për bombardime të mëtejshme të qyteteve dhe fshatrave të Ukrainës, pasi nuk pranoi të krijonte një zonë ndalim-fluturimi”, citohet të ketë thënë më tej ai.

Ndryshe, Ukraina ka kërkuar vazhdimisht që partnerët perëndimorë të zbatojnë një zonë ndalim-fluturimi për të zvogëluar aftësinë e ushtrisë ruse për të sulmuar objektivat ukrainas nga ajri.

Në një video-mesazh më herët të premten, ministri i Jashtëm ukrainas Dmytro Kuleba tha se ministrat e jashtëm të NATO-s nuk duhet të lejojnë Putinin të “ta kthejë Ukrainën në Siri”, në lidhje me fushatën shkatërruese të mbështetur nga Rusia kundër qyteteve në atë vend.

Lexo po ashtu Gjithçka që ndodhi nga dita e tetë deri në ditën e njëmbëdhjetë të agresionit rus në Ukrainë

“Veproni tani para se të jetë vonë”, tha ai në mesazh.

Lutja erdhi gjithashtu pasi një sulm rus në centralin bërthamor të Zaporizhzhia të Ukrainës, instalimi më i madh i tillë në Evropë, ngriti frikën për implikime më të gjera të një avancimi të mëtejshëm rus.

Por, anëtarët e NATO-s kanë dërguar armë në Ukrainë, por nuk ka gjasa të lëvizin diku afër veprimit ushtarak.

Krijimi i një zone ndalim-fluturimi mbi Ukrainë mund të rezultojë në luftë duke shkaktuar një konflikt më të gjerë dhe potencialisht të rrezikojë përhapjen e tij në më shumë vende evropiane, tha Jens Stoltenberg, duke hedhur poshtë kërkesat e Kievit për të zbatuar një zonë të tillë.

Lexo po ashtu Navalny u bën thirrje rusëve në mbarë botën të protestojnë më 6 mars, kundër agresionit në Ukrainë

“Mënyra e vetme për të zbatuar një zonë të ndaluar fluturimi është dërgimi i avionëve të NATO-s, aeroplanëve luftarakë, në hapësirën ajrore të Ukrainës, dhe më pas vendosja e asaj zone të ndaluar fluturimi duke rrëzuar aeroplanët rusë”, tha Stoltenberg.

“Nëse e bëjmë këtë, do të përfundojmë me diçka që mund të përfundojë në një luftë të plotë në Evropë, duke përfshirë shumë vende të tjera dhe duke shkaktuar shumë më tepër vuajtje njerëzore”, shtoi ai. /Telegrafi/