Mustafa: Rritja e punësimit në Kosovë është vetëm një iluzion, Kurti po mashtron publikun

Arben Mustafa, koordinator për financa në kuadër të Kabinetit për Qeverisje të Mirë të PDK-së, ka kundërshtuar deklaratën e kryeministrit Albin Kurti se Kosova ka shënuar rritje enorme të punësimit gjatë këtyre katër viteve.

Mustafa në një postim në Facebook, ka shkruar se kjo nuk është gjë tjetër përveç se një tendencë për mashtrim të publikut.

Lexo po ashtu ​Kurti: Punësimi në Kosovë është rritur për 20 për qind

“Se çka mund të ketë ndodhë me punësimin gjatë këtyre viteve, më së miri tregon figura e mëposhtme e cila shpërfaqë stagnimin e ekonomisë. Me rritjen ekonomike nën 4%, investimet private në rënie të vazhdueshme,  investimet publike më të ulëtat dhe  deficitin tregtar më të lartin në histori nuk mund të ketë lulëzim të ekonomisë e as të punësimit”, ka shkruar Mustafa.

Ai ka shtuar se punësimet e përkohshme nga 6 muaj me para të shtetit nuk flasin për punësim, po vetëm për një mekanizëm të transferit të përkohshëm të një shume të parave te qytetarët.

“Nuk ka rritje të punësimit me këtë aktivitet të ulët ekonomik!”, ka shkruar Mustafa. /Telegrafi/