Murati: Në vitin 2023 shpenzimet janë rritur për 13% krahasuar me vitin paraprak

Ministri i Financave, Hekuran Murati thotë se sipas raportit preliminar të shpenzimit të buxhetit, në vitin 2023 shpenzimet janë rritur për 13% krahasuar me vitin paraprak.

Murati përmes një postimi në Facebook, ka deklaruar se investimet kapitale është kategoria që është rritur më së shumti në vitin 2023, me 32% më shumë sesa viti 2022.

“Kategoria Paga dhe Shtesa është e dyta me kontributin më të madh në rritjen e buxhetit, me 114 milionë euro më shumë, apo 17% më shumë sesa viti 2022. Kjo tregon se në sektorin publik ka pasur rritje mesatare të pagave që ka tejkaluar shkallën mesatare të inflacionit prej 11.6% të vitit 2022”, thotë ai.

Gjithashtu, ministri ka shkruar se mallrat dhe shërbimet gjithashtu me 17% kanë trendin e njëjtë të rritjes, mirëpo si vlerë absolute rritja është përgjysmë më pak sesa kategoria Paga dhe Shtesa.

“Ndërsa Subvencionet dhe Transferet kanë pasur rritjen më të vogël nga të gjitha kategoritë, me vetëm 1%”, vijon postimi i tij./Telegrafi/