MSH-ja thotë se do të shqyrtojë të gjitha ankesat e kandidatëve për inspektorë sanitarë

Ministria e Shëndetësisë ka bërë përzgjedhjen e 85 inspektorëve sanitarë, të cilët do të ndihmojnë në mbikëqyrjen dhe kontrollimin e zbatimit të masave antiCOVID-19, të cilët janë thirrur për të nënshkruar kontratën pa përfunduar afati i ankesave prej 3 ditësh.

Për përzgjedhjen e këtyre inspektorëve në adresë të Telegrafit kanë shprehur shqetësimin e tyre dy aplikantë njëherit ish- inspektorë.

Duke dashur të mbesin anonim shkaku i ankesës që kanë paraqitur në Ministrinë e Shëndetësisë, ata thanë për Telegrafin se inspektorët e përzgjedhur janë krejtësisht të rinj, dhe se shumë nga ta nuk kanë përvojë pune, e cila ka qenë njëra prej kritereve në konkurs.

Lexo po ashtu Pakënaqësi rreth përzgjedhjes së 85 inspektorëve sanitarë, filluan punën pa përfunduar afati i ankesave

Në lidhje me këtë ministri i Shëndetësisë, Arben Vitia ka thënë se të gjitha ankesat nga kandidatët do të shqyrtohen.

“85 inspektorët që ka dal lista dje, janë thirrur sot për të nënshkruar kontratën, institucioni i ankesës nuk do të anashkalohet. Secila ankesë do të merret parasysh që këto probleme të mos përsëriten. Ka qenë një volum i madh, kanë qenë mbi 600 aplikime dhe ka pakënaqësi ku mbi 500 persona nuk janë pranuar. Komisioni i ankesave janë duke i shqyrtuar dhe të jeni të bindur se secila ankesë do të ketë përgjigje meritore në bazë të ligjit”, tha Vitia. /Telegrafi/