MPJ njofton se asnjë kosovarë nuk ka qenë viktimë e sulmit terroristë në Zelandë të Re

Ministria e Punëve të Jashtme e Republikës së Kosovës përmes një njoftimi për media ka bërë të ditur se asnjë kosovarë nuk ka qenë viktimë e sulmeve që ndodhën në dy xhami sot në Zelandën e Re.

“MPJ në mbështetje të informacioneve të pranuara deri më tash nëpërmjet kanaleve diplomatike konfirmon se nuk ka shtetas kosovarë, që janë prekur nga sulmi terrorist, që ndodhi të premten në dy xhami në Zelandën e Re, dhe i cili la të vdekur dhjetëra persona.

Lexo po ashtu Të gjitha lajmet rreth sulmit në Zelandë të Re

Ministria e Punëve të Jashtme nëpërmjet Ambasadës së Republikës së Kosovës në Australi, e cila e mbulon edhe Zelandën e Re është duke i përcjellur nga afër zhvillimet e sotme dhe në kontakt të vazhdueshëm me autoritetet zyrtare të Zelandës së Re dhe tashmë ka vënë në shërbim edhe numrat emergjent për të gjithë shtetasit kosovarë, që mund të kenë nevojë për asistencë konsullore”, thuhet në njoftimin për media.

MPJ ka publikuar edhe numrat emergjent, ku shtetasit kosovar mund të thërrasin.

Numrat emergjentë janë si në vijim: +61 (02) 261130366 , +61403517113. /Telegrafi/