Morgjet janë stërmbushur me viktima të COVID-19 në SHBA, mbi 140 mijë të vdekur – numri i të infektuarve po rritet me shpejtësi

Numri i të vdekurve nga coronavirusi në SHBA ka tejkaluar shifrën prej 140 mijë. Në 42 nga 50 shtetet amerikane, numri i të infektuarve të rinj në dy javët e fundit është duke u rritur me shpejtësi të madhe, shkruan Reuters.

Sipas analizës së kësaj agjencie të lajmeve, nga fillimi i qershorit në SHBA ka ndodhur rritja e madhe e rasteve të reja me COVID-19, kurse gjashtë javë më vonë numri i rasteve me vdekje po rritet edhe më shumë, transmeton Telegrafi.

Në SHBA çdo javë humbin jetën 5 mijë persona, kurse në Kanadanë fqinje nga fillimi i shpërthimit të pandemisë kanë humbur jetën 8.800 persona.

Për vetëm një javë në SHBA janë regjistruar 5.600 viktima, aq sa ka Suedia që nga fillimi i shpërthimit të pandemisë që ngriti në këmbë botën.

E në vendet më të goditura në SHBA, po mungojnë hapësirat për vendosjen e kufomave, pasi që morgjet tashmë janë stërmbushur.

Në Marikopa të Arizonës, janë detyruar të mbushin 14 kamionë frigoriferë për të futur 280 trupa të pajetë, e sipas ekspertëve të shëndetësisë numri i viktimave pritet të rritet nga çasti në çast.

Në Teksas më saktësisht në San Antonio, janë porositur pesë kamionë frigorifer brenda të cilëve do të futen 180 kufoma. Pamje të tilla të kamionëve me kufoma fillimisht ishin vërejtur në pikun e pandemisë në Neë York. /Telegrafi/