“Moment historik” – Shkolla e Artit Pamor fiton garat komunale të futsallit në Gjilan

Në palestrën “Bashkim Selishta” në Gjilan janë mbajtur garat komunale të futsallit, ku nxënësit e Shkollës së Artit Pamor kanë fituar kupën e vendit të parë.

Përmes një njoftimi, shkolla ka bërë të ditur se ky sukses është rezultat i punës së palodhshme, përkushtimit dhe bashkëpunimit të nxënësve dhe mësimdhënësve.

“Ky është një moment historik që pasqyron angazhimin dhe përkushtimin e të gjithë nxënësve dhe mësimdhënësve të shkollës sonë,” thuhet në njoftim.

Në shenjë mirënjohjeje, drejtori i shkollës, Roland Masurica, priti ekipin fitues në një takim të veçantë, së bashku me mësimdhënësen e edukatës fizike, Arta Rexhepi.

“Një falënderim i veçantë shkon për znj. Arta Rexhepi, për udhëheqjen dhe mbështetjen e jashtëzakonshme ndaj nxënësve me talent në sport. Ky ekip përfaqësues ka edhe dy sfida të rëndësishme përpara: garat rajonale dhe ato republikane të futsallit,” deklaroi Masurica.

Ai shtoi se shkolla është e përkushtuar për të përmirësuar kushtet infrastrukturore sportive, me qëllim që të nxisë rezultate të larta dhe të zhvillojë aftësitë e nxënësve me prirje në sport.

“Urime ekipit tonë për shpirtin luftarak dhe përfaqësimin dinjitoz të shkollës sonë! Ju jeni krenaria jonë,” përfundoi drejtori Masurica. /Telegrafi/