Mirel Josa: Jam i dëshpëruar me humbjen, do të ketë ndryshime

Prishtina ka pësuar humbje të papritur dhe ka humbur pozitën e parë në IPKO Superligë të Kosovës.

Bardhekaltërit kanë humbur para shikuesve të vetë kundër rivalit lokal të Flamurtarit me rezultat 2:0.

Pas ndeshjes ka folur edhe trajneri i “Plisave”, Mirel Josa, i cili ka arsyetuar lojën e të të besuarve të tij duke thënë se ndihet i dëshpëruar me humbjen.

“Me Trepçën ’89 krijuam më tepër raste, por në këtë ndeshje ishte e kundërta. Pas kartonit të kuq të Flamurtarit, lojtarët kishin shumë vetëbesim”.

“Jam i dëshpëruar me humbjen duke ditur se luajtëm para shikuesve tanë. Pësimi i dy golave nga kundërshtari që kishte 10 lojtarë, na dërgon të mendojmë shumë. Ne duhet të punojmë se si të veprohet në shumë kushte”.

“Duhet të reagonim shumë më mirë në pjesën e dytë. Lojtarët nuk u morën shumë me zhvillimin e lojës, sepse u morën me veprime individuale”.

“Ne duhet ta fusnim në presion kundërshtarin, me pasime te shkurtra dhe të shpejta. Do të kemi ndryshime në mënyrën e lojës”, tha trajneri shqiptar.

Lexo po ashtu Flamurtari triumfon në derbin kryeqytetas ndaj Prishtinës

Pas kësaj, Prishtina zë pozitën e dytë të renditjes tabelore me 40 pikë ndërsa kuqezinjtë gjenden në vendin e gjashtë me 25 pikë.

Ndryshe, Prishtina në takimin e radhës do të luajë sërish si vendas tani kundër Lirisë gjersa Flamurtari do të jetë mysafir i Gjilanit. /Telegrafi/