Ministrja nga AAK-ja kundër propozimit të Qeverisë për izolim të qytetarëve që vijnë nga Shqipëria

Ministrja e Punëve të Jashtme dhe Diasporës, Meliza Haradinaj-Stublla ka reaguar ndaj propozimit për shtim të masave nga Qeveria për qytetarët e Kosovës të cilët vijnë nga Shqipëria, që të kenë me vete testin negativ ndaj virusit COVID-19.

Haradinaj-Stublla përmes një statusi në rrjetin social në Facebook ka shkruar se propozimi për kërkimin e kryerjes së testit për hyrje nga kufiri me Shqipërinë është absurd.

Sipas saj, një numër i madh i qytetarëve veçse janë në Shqipëri dhe në mungesë të testeve siç ka thënë ajo është absurde të vetë izolohen rreth 100,000 qytetarë, pa asnjë bazë.

“Propozimet për shtim të masave duke kërkuar testin negativ për hyrje nga kufiri me Shqipërinë, janë absurde, thënë më së paku. Është një numër i madh i qytetarëve tanë që veçse janë në Shqipëri, dhe në mungesë të testeve, është krejt absurde të vetë izolohen rreth 100,000 qytetarë, pa asnjë bazë. Logjika e izolimit total kufitar, ka sjellë vetëm dëme, sidomos për ata që kanë nevojë për trajtim shëndetësor jashtë Kosovës! Unë do të votoj KUNDËR këtij propozimi”, ka thënë ajo.

Ministrja Haradinaj-Stublla ka thënë se masat e rekomanduara nga IKSHPK-ja duhet të respektohen maksimalisht nga qytetarët.

“Masat e rekomanduara nga IKSHP, duhet të respektohen maksimalisht nga qytetarët, por jo të izolohemi e të thellohet edhe më tej kriza. Higjienë, distancë dhe maskë! Kaq e thjeshtë”, ka thënë ministrja e MPJ-së, Haradinaj-Stublla. /Telegrafi/