Ministri Hasani në Paris në konferencën “Konkurrueshmëria dhe zhvillimi i sektorit privat”

Ministri i Tregtisë dhe Industrisë, Bajram Hasani po qëndron në Francë ku po merr pjesë në konferencën “Konkurrueshmëria dhe zhvillimi i sektorit privat” në të cilën po marrin pjesë ministra nga vende të ndryshme të Evropës juglindore.

I shoqëruar nga ambasadori i Kosovës në Francë, Qëndrim Gashi, Hasani në këtë konferencë ka falënderuar organizatorin e konferencës, Organizatën për Bashkëpunim dhe Zhvillim Ekonomik (OECD), për mbështetjen e tyre të vazhdueshme për zhvillimin ekonomik të Kosovës.

Hasani ka thënë që rekomandimet që merr Kosova nga organizata të huaja, siç është edhe OECD-së, përmes studimeve të ndryshme, përmes pjesëmarrjes në trajnime dhe punëtori të ndryshme të organizuara nga këto institucione, përmes analizave të ndryshme dhe raporteve që ato bëjnë në bashkëpunim të ngushtë me institucionet e Kosovës. Sipas tij ky është një kontribut i rëndësishëm.

“Këto kanë qenë shumë fitimprurëse për ne dhe vazhdojmë të luajnë një rol kyç në zhvillimin dhe zbatimin e rekomandimeve të politikave, strukturën institucionale, kuadrin ligjor, rregullat dhe reformat rregullative që kemi ndërmarrë gjatë epokës sonë të pas luftës, etj”, tha Hasani, përcjell Telegrafi.

Ministri Hasani po ashtu ka përmendur lehtësirat që kanë ardhur nga CEFTA e të cilat kanë mbështetur liberalizimin e tregtisë për mallra dhe shërbime në rajon.

“Për sa i përket tregtisë, vlen të përmendet mbështetja e OECD u dha vendeve të CEFTA-së për të na ndihmuar në liberalizimin e mëtejshëm të tregtisë në rajonin tonë. Në veçanti, seritë e Çështjeve të CEFTA-s, të cilat trajtuan çështje shumë të rëndësishme në fushën e tregtisë, siç janë eliminimi i barrierave jo-tarifore, integrimi i tregtisë, hyrjet e IHD-ve, të drejtat e pronësisë intelektuale dhe kështu me radhë, kanë provuar të jenë shumë të dobishme për sa i përket eliminimin e barrierave jo-tarifore dhe mbështetjen e liberalizimit të tregtisë për mallra dhe shërbime në rajonin tonë. Një analizë e tillë na ndihmoi të kuptojmë se ku është bërë progres dhe ku duhet bërë më shumë punë”, theksoi Hasani.

Hasani ka shprehur gatishmërinë dhe zotimin e tij për të vazhduar këtë bashkëpunim të ngushtë me Komisionin Evropian dhe organizatat siç janë OECD.

“Ne i mirëpresim publikimet e tilla nga OECD, sepse na japin njohuritë teknike të nevojshme për të arritur potencialin maksimal të përfitimeve të liberalizimit të tregtisë. Jemi shumë të vendosur të vazhdojmë të bashkëpunojmë ngushtë me Komisionin Evropian dhe organizatat siç është OECD në lidhje me të gjitha çështjet që kanë të bëjnë me tregtinë”, nënvizoi Hasani. /Telegrafi/