Miliona telefona në Android të rrezikuar nga Heartbleed

Virusi i shumë-përfolur Heartbleed nuk i rrezikon vetëm uebfaqet dhe ruterët, pasi që edhe disa modele të telefonave të mençur Android rrezikohen, gjithashtu.

Në deklaratën e kompanisë Google për Heartbleed thuhet se telefonat mobil që bazohen në versionin e Android, 4.1.1 Jelly Bean janë gjithashtu të “thyeshëm” nga Heartbleed, ndërsa gjiganti amerikan i teknologjisë ka thënë se këtë paralajmërim ua ka dhënë parterëve të saj.

Edhe pse dihet se 34.4% e telefonave Android bazohen në Jelly Bean, Google nuk ka mundur të jap shifra të sakta se sa prej tyre bazohen në versionin 4.1.1 dhe 4.1.2, pasi që përditësimet e versioneve të sistemit operativ mobil të Google kontrollohen nga prodhuesit e telefonave dhe operatorët mobil.

Versionet e vetme të Android që kontrollohen nga Google janë pajisjet mobile të linjës Nexus dhe ato të versionit Google Play Edition.

Versioni i fundit i Jelly Bean është 4.1.2, i cili është lëshuar në qarkullim në tetor të vitit 2012. HTC One është njëri prej modeleve që bazohet në Android 4.1.1.

Një zëdhënës i kompanisë Google e ka konfirmuar për Bloomberg se në treg sot janë me miliona telefona që bazohen në Android 4.1.1. / Telegrafi /