Miftaraj: VV-ja ngadal dhe sigurt po e korrupton luftimin e korrupsionit në Kosovë

Ehat Miftaraj, drejtor Ekzekutiv në Institutin e Kosovës për Drejtësi, ka kritikuar partinë në pushtet – Lëvizjen Vetëvendosje – duke thënë se ngadal dhe sigurt “po e korrupton luftimin e korrupsionit në Kosovë”.

Sipas tij, kjo parti po ofron imunitet të plotë për secilin anëtar të saj kur kapen në afera korruptive, kështu duke mos lënë shpresë te qytetarët se është ndryshe nga subjektet tjera politike.

“Nga një parti plot gojën luftë kundër korrupsionit, qeverisje me duar të pastra, depolitizim të bordeve dhe ndërmarrjeve publike, është kthyer në pushtet ku luftohet korrupsioni vetëm ndaj kundërshtarëve politikë”, ka shkruar Miftaraj në rrjetin social Facebook.

Ky reagim i tij vjen pasi Partia Demokratike e Kosovës akuzoi ministren e Punëve të Jashtme dhe Diasporës, Donika Gërvallën, dhe Ministrin e Zhvillimit Rajonal, Fitim Damkën, se kanë shpenzuar kundërligjshëm 1 milion e 40 mijë euro nga buxheti i shtetit përmes një “Memorandum Bashkëpunimi”, në mes të MZHR-së dhe Caritas-it Zviceran.

E sipas Miftarajt, reagimi i Qeverisë për këtë rast do të duhej të ishte i ashpër, i drejtpërdrejtë dhe pa i kompromis.

“Këtë nuk po e shohim, së paku jo deri tani. Kultura e pandëshkueshmerisë sinonim i qeverisjes në Kosovë”, ka përfunduar ai. /Telegrafi/