Meta do të investojë 65 miliardë dollarë në një qendër të dhënash ‘AI’ – ajo do të jetë gati sa Manhattan

Platforma Meta planifikon të shpenzojë nga 60 deri në 65 miliardë dollarë për të ndërtuar infrastrukturën e saj të inteligjencës artificiale, tha Mark Zuckerberg.

CEO-ja i gjigantit të mediave sociale dhe teknologjisë deklaroi se kompania do të ndërtojë një qendër të dhënash me kapacitet mbi 2GW, e cila “do të mbulonte një pjesë të konsiderueshme të Manhattan-it”, New York.

Kjo qendër do të sigurojë rreth 1GW fuqi llogaritëse gjatë këtij viti, ndërsa kompania pret që deri në fund të vitit 2025 të ketë në dispozicion më shumë se 1.3 milion GPU.

“Ky do të jetë një vit përcaktues për AI. Në vitin 2025, pres që Meta AI të jetë asistenti kryesor, duke u shërbyer më shumë se 1 miliard njerëzve; Llama 4 do të bëhet modeli më i avancuar i gjendjes aktuale, dhe ne do të ndërtojmë një inxhinier AI që do të fillojë të kontribuojë gjithnjë e më shumë në përpjekjet tona për kërkim dhe zhvillim”, shkroi Zuckerberg në X.

Miliarderi shtoi se kompania ka fonde të mjaftueshme për të vazhduar investimet në infrastrukturën e inteligjencës artificiale në vitet e ardhshme dhe pret që kjo përpjekje të ndikojë në produktet dhe biznesin kryesor të kompanisë.

Ndryshe, aksionet e NVIDIA (NVDA), Taiwan Semiconductor (TSM) dhe Arista Networks (ANET) reaguan ndaj njoftimit, por më pas ranë në nivele pothuajse të qëndrueshme. /Telegrafi/