Messi i jep lajmin e hidhur PSG-së para rinovimit të kontratës

Paris Saint-Germain po përballet me një betejë të vazhdueshme për të mbajtur Lionel Messin në klub këtë verë.

E ardhmja e argjentinasit vazhdon të jetë një pikë e madhe diskutimi në Parc des Princes, me kontratën e tij aktuale që skadon në fund të qershorit dhe nuk ka përparim për një zgjatje.

PSG ka një opsion për t’i ofruar Messit edhe 12 muaj shtesë në klub, sipas marrëveshjes së tyre origjinale, por 35-vjeçari thuhet se është gati të largohet.

Shanset e Barcelonës për ta rikthyer atë në Camp Nou janë rritur me nënpresidentin e klubit Rafa Yuste që konfirmoi se janë në bisedime me përfaqësuesit e tij.

Pavarësisht raportimeve se PSG është e gatshme t’i ofrojë Messit një kontratë sipas kushteve të tij,  Goal.com pretendon se klubi duhet të ulë faturën e pagave me 30 për qind për të përballuar rinovimin e Messit.

PSG mund t’i ofrojë 35-vjeçarit një kontratë të reduktuar, por argjentinasi ka të ngjarë ta refuzojë këtë, me Barcelonën që ka një shans më të mirë me një pagë më të ulët, për shkak të lidhjes së tyre me të. /Telegrafi/