Është mbyllur afati kalimtar për futbollistë në elitën e futbollit kosovar.
Klubet e elitës së futbollit kosovar kanë pasur kohë deri para pak minutash të bëjnë transferime.
Edhe këtë afat kalimtar skuadrat pretendente për titull kanë qenë më aktive, duke u përforcuar për edicionin e ri.
Llapi ka qenë skuadra që është përforcuar më së shumti, pasi ekipi i udhëhequr nga Tahir Batatina ka transferuar hiq më pak se 15 futbollistë.
Pas Llapit vijnë skuadrat si Feronikeli, Ballkani, Prishtina dhe debutuesit e elitës së futbollit kosovar, Arbëria.
Kampioni në fuqi i Kosovës, Drita ka mbajtur lojtarët kryesorë, teksa ka bërë pesë prurje të reja.
Edhe nënkampioni kosovar, Gjilani deri në këto momente ka bërë vetëm gjashtë transferime.
Besa e rikthyer në elitë ka regjistruar në FFK 16 futbollistë të rinjë, por klubi pejan nuk e ka prezantuar çuditërisht asnjë deri më tani në faqen e saj apo në rrjetet sociale.
Edhe këtë herë nuk munguan transferime bombastike nga skuadrat kosovare, teksa shumë emra të njohur kanë zbarkuar në kampionatin tonë.
Prishtina ka marrë reprezentuesin e Kombëtares së Shqipërisë, Sabjen Lilaj, teksa emra tjerë të mëdhenj janë edhe Gledi Mici apo talenti i Luganos, Leutrim Kryeziu.
Ish-reprezentuesi kosovar, Alban Pnishi do të bart fanellën e Feronikelit, teksa Llapi ka rikthyer në radhët e veta një ‘bomber’ si Ahmed Januzi.
Gjilani ka marrë ish-portierin e Kombëtares së Shqipërisë, Enea Koliqi, ndërsa skuadrës së Mezanit i janë bashkuar edhe dy mbrojtësit kroat Tomislav Sorsa dhe Ivan Fustar, ndërsa në ditën e fundit kanë nënshkruar me Arbër Çyrbjën nga Teuta e Durrësit.
Kampioni në fuqi i Kosovës, Drita ka marrë ish-reprezentuesin maqedonas Vladica Brdarovski, ndërsa Ballkani ish-reprezentuesin e Kosovës, Bajram Jashanica por edhe dy yjet nga Pristhina, Meriton Korenica e Armend Thaqi.
/Telegrafi/
