Mbrojtja e liderëve të opozitës – eksperti i sigurisë: Kërcënimet e mundshme nga Serbia, synojnë degradimin e situatës në Kosovë

Kryetari i PDK-së, Memli Krasniqi dhe ai i LDK-së, Lumir Abdixhiku së fundmi janë marrë në mbrojtje nga Policia e Kosovës, pas informacioneve për kërcënime të mundshme nga grupe terroriste serbe.

Telegrafi të hënën raportoi se drejtori i Policisë, Gazmend Hoxha, e ka njoftuar opozitën se mund të jenë cak i sulmeve të caktuara. Andaj për këtë, është rekomanduar mbrojtja e afërt.

Eksperti i sigurisë, Hajrullah Tërnava, vlerëson se nëse këto kërcënime vijnë nga Serbia, qëllimi i tyre është që të përkeqësojnë situatën politike në Kosovë.

Lexo po ashtu "Kërcënimet nga grupe terroriste serbe": Policia merr në mbrojtje Krasniqin, Abdixhikun e politikanë të tjerë

Në një prononcim për Telegrafin, Tërnava ka theksuar se situatat politike konfliktuoze që po zgjasin me vite të tëra që pas luftës e deri më tani nga Serbia ndaj Kosovës e që u dëshmua me sulmin terrorist të Serbisë ndaj territorit të Kosovës më 24 shtator, më bënë të kuptoj që kërcënimet e tilla sikur që po ndodhin ndaj prijësve të partive politike sikur në këtë rast, janë luftë speciale e kohës, për ti arritur qëllimet e tyre ata që i bëjnë këto kërcënime.

“Këto kërcënime sikur po vërehen e kanë edhe prapavijë e tyre që nëse vijnë nga Serbia, qëllimi i tyre është që ta përkeqësojnë situatën politike në Kosovë mes partive ekzistuese, sepse sikur që dihet Vuçiqi disa herë është deklaruar se e ka të vështirë që të bashkëpunoj me kryeministrin Kurti për çështjet që tani janë aktuale”, ka thënë Tërnava.

Ai ka shtuar se shërbimet ekzistuese duhet t’i kryejnë obligimet e tyre të përditshme dhe t’i zbulojnë ata kërcënues terroristë dhe të marrin masa ndaj tyre gjithnjë edhe duke bashkëpunuar me ndërkombëtarët si dhe shërbimet profesionale si me KFOR-in dhe INTERPOL-in.

Lexo po ashtu U mor në mbrojtje nga policia, Krasniqi: Nuk jam ndjerë asnjëherë i kërcënuar edhe kur kanë rrjedh informacione për vrasje

Tërnava ka theksuar se institucionet e sigurisë, policia dhe AKI-ja duhet të merren me zbardhjen e këtyre kërcënimeve.

“Duke pasur parasysh se shteti i Kosovës tani i ka institucionet profesionale të policisë dhe shërbimet sekrete siç është AKI, tani këto shërbime duhet të merren me zbardhjen e këtyre kërcënimeve, dhe nëse vlerësohen si të vërteta ato kërcënime, ata duhet t’iu qëndrojnë pranë të kërcënuarave në mbrojtje të tyre, dhe të punojnë në zbardhjen e atyre kërcënimeve nga kush vijnë ato, kush janë autorët dhe ndaj atyre personave të ndermirën masa ligjore”, u shpreh eksperti i sigurisë për Telegrafin.

Tërnava tutje ka shtuar se situata politike tani në Kosovë dhe ajo që po mbretëron në regjion dhe botë, e imponon një pajtim të mundshëm me ndihmën e ndërkombëtarëve e sidomos jetësimit të marrëveshjes së Ohrit të arritur më parë.

Lidhur me këto kërcënime sot është deklaruar edhe kryetari i PDK-së, Memli Krasniqi. Krasniqi ka thënë se asnjëherë nuk është ndjerë i kërcënuar edhe kur kanë rrjedh informacione për vrasje.

“Nuk jam ndjerë asnjëherë i kërcënuar edhe kur na ka rrjedh informacion për kërcënime me vrasje edhe para pak muajsh. Por, ka qenë vlerësim i organeve të sigurisë që të na ofrojnë mbrojtjen e afërt, për arsye besoj që ata duhet të tregojnë, besoj që lidhet me situatën e tensionuar dhe të përkeqësuar pas sulmeve në veri të vendit”, ka thënë Krasniqi.

E nënkryetari i LDK-së, Lutfi Haziri tha se Abdixhiku iu ka besuar vlerësimeve të organeve të shtetit, mirëpo siç tha ai, i pari i LDK-së nuk e ka ndërprerë agjendën e tij.

Lexo po ashtu Kërcënimet ndaj kreut të LDK-së, deklarohet Haziri

“I ka besu vlerësimeve të organeve të shtetit, dhe po sillet karshi atij vlerësimi. Nuk ka ndërpre asgjë në agjendën edhe në rutinën e tij. Policia ka kapacitete profesionale me siguru, vetëm është rrit kujdesi i organeve të sigurisë. Pasiguri juridike ka në Kosovë dhe kjo është më problematike dhe na shqetëson si LDK më shumë”, ka thënë Haziri.

Ndryshe edhe Policia e Kosovës ka konfirmuar sot për Telegrafin se u ka ofruar mbrojtje krerëve të partive opozitare PDK, LDK dhe politikanëve tjerë.

“Policia e Kosovës në kuadër të detyrave dhe autorizimeve ligjore që ka, bënë edhe vlerësimin e sigurisë së personaliteteve të rëndësisë së veçantë dhe varësisht nga informacionet apo të gjeturat ndërmerr masat për ofrimin e sigurisë. Në këtë rast edhe ndaj personaliteteve në fjalë ka ndërmarrë masa për ofrimin e sigurisë dhe të njëjtëve sipas vlerësimit iu është ofruar siguri”, thuhet në përgjigjen e dhënë nga Policia e Kosovës. /Telegrafi/