Mbrojtësi i Romës fton publikisht Nainggolanin të rikthehet: Jemi duke të pritur ty, po na mungon si lider

Radja Nainggolan mund të rikthehet te Roma gjatë afatit kalimtar të verës.

Pasi kanë kaluar dy vite prej largimit të tij nga Giallorosët, belgu po flitet se mund të rikthehet në kryeqytetin italian.

Fillimisht Nainggolan kaloi një sezon te Interi, ndërsa aktualisht është i huazuar ta Cagliari.

Roma po mendon rikthimin e tij, ndërsa edhe vet Nainggolan që është i dashuruar me Giallorosët ka shprehur gatishmërinë të rikthehet në Olimpico edhe për një pagë më të ulët.

31-vjeçari e ka uruar për ditëlindje mbrojtësin brazilian Juan Jesus, ndërsa ky i fundit publikisht ka kërkuar rikthimin e tij te Roma.

“Urimet më të mira njeriu im, shihemi së shpejti”, ka shkruar Nainggolan në Instagram.

“Ne jemi duke të pritur ty, po mungon lideri i dhomës tonë”, i ka kthyer përgjigjen braziliani.

Kjo ka mjaftuar që tifozët e Romës t’ia mësyjnë komenteve në Instagram duke kërkuar rikthimin e belgut.

Nainggolan kaloi katër vite e gjysmë te Roma, ndërsa ai u bë njëri nga lojtarët më të dashur nga tifozët verdhekuq.

Roma mund ta rikthejë atë në Olimpico, por duhet që të paguajë 15 milionë euro te Interi. /Telegrafi/