Mblidhet Grupi koordinues ndër-ministror kundër dhunës në familje

Grupi koordinues ndërministror kundër dhunës në familje, kryesuar nga koordinatorja kombëtare, Nita Shala ka mbajtur sot takimin e radhës.

Në takim morën pjesë përfaqësues nga policia, prokuroria, mbrojtësit e viktimave, gjykata, Ministria e Shëndetësisë, ajo e Arsimit, Punëve të Brendshme, Agjencia për Barazi Gjinore, Avokati i Popullit.

Ministrja e Drejtësisë Albulena Haxhiu tha se lufta ndaj fenomenit të dhunës ndaj grave dhe vajzave si dhe dhunës në familje, mbetet luftë e pa kompromis për të cilën kërkoi të ndërmerren veprime konkrete për ngritjen e efikasitetit të këtyre institucioneve.

Në takim u raportua nga institucionet përgjegjëse progresi drejt zbatimit të Planit të Veprimit të Strategjisë Kombëtare për Mbrojtje nga Dhuna në Familje, zhvillimet drejt hartimit të projekt-Ligjit për Mbrojtje nga Dhuna në Familje.

Po ashtu u raportua mbi punimet e Grupit të Përgjigjes Emergjente dhe hapave drejt krijimit të Komisionit Profesional që do të bëjë analizën e dakorduar nga anëtarët e Grupit të Përgjigjes Emergjente.

Pjesëmarrësit diskutuan edhe mbi data-bazën për mbrojtje nga dhuna në familje, rëndësinë dhe potencialin e saj si dhe planifikimi i fushatës sensibilizuese “16 ditë aktivizimi kundër dhunës në familje”.