Mbështetje për studentët – 100 bursa nga kampanja e Golden Eagle dhe Frutex

Fondacioni Golden Eagle dhe kompania Frutex sot kanë ndarë 35 bursa nga gjithsej 100 për studentët nga Kosova, Shqipëria, Maqedonia dhe Presheva.

Gjatë ceremonisë së ndarjes së bursave, përfaqësuesi i Fondacionit Golden Eagle, Fisnik Kryeziu, tha se këto bursa janë rezultat i një kampanje ku për çdo produkt të shitur janë ndarë pesë cent për mbështetje të studentëve.

Ai theksoi se bursa ka për qëllim të lehtësojë barrën financiare të studentëve dhe t’i motivojë ata të jenë shembull për gjeneratat e reja.

“Fondacioni Golden Eagle së bashku me kompaninë Frutex kanë organizuar një kampanjë ku për çdo produkt të shitur kanë ndarë nga pesë cent për bursa për studime. Bashkërisht kemi vendosur që të ndajmë 100 bursa për studime. Të drejtën e aplikimit e kanë pasur studentët nga Kosova, Shqipëria, Maqedonia dhe Presheva. E gjitha çka presim nga këta studentë është që të studiojnë dhe të jenë shembull për gjeneratat e reja”, ka thënë Kryeziu.

Një nga përfitueset, Lendita Elshani, shprehu mirënjohjen e saj duke treguar se lajmi për bursën prej 800 euro e ka gëzuar shumë, sidomos duke marrë parasysh rritjen e kostove të jetesës në Prishtinë.

“Njëherë nuk e kam besuar, por kur e konfirmova që është e vërtetë u gëzova shumë. Për ne është një lehtësim jashtëzakonisht i madh duke marr parasysh që tash në Prishtinë çmimet janë rritur shumë, por edhe çmimet e biletave janë rrit dhe një bursë është një ndihmë shumë e madhe”, ka thënë ajo.

Edhe Ardit Hyseni u shpreh se kjo bursë do ta ndihmojë të fokusohet më shumë në studimet e tij, duke ulur shqetësimet financiare.

“Lajmin që e kam fituar bursën nga Golden Eagle ka qenë një lajm mjaft i gëzuar për mua, sepse kjo bursë do të më lehtësojë barrën financiare dhe gjithashtu do të më lejojë që të fokusohem më tepër në mësime”, u shpreh ai.

Arlinda Abazi, një tjetër përfituese, tha se aplikimi ishte spontan, por lajmi për bursën e ka mbushur me motiv për të vazhduar përpjekjet akademike.

“Kam aplikuar rastësisht në rrjete sociale, pasi e kam parë këtë aplikim për bursë dhe normalisht nuk e kam pritur që kam me qenë një ndër fitueset, por kur e mora lajmin normal jam gëzuar shumë dhe e kam pa si një shtysë për të gjithë studentët për të vazhduar më tej me një motiv të madh”, theksoi Abazi. /Telegrafi/