Masakra në Shkodër, djali i ish-kandidatit të PD në gjendje të rëndë për jetën, dy javë më parë denoncoi në polici Bajrajt  

Një masakër me katër viktima ka ndodhur pasditen e kësaj të mërkure në zonën e njohur si “5 Heronjtë e Vigut”, në qytetin e Shkodrës.

Mësohet se dy nga viktimat janë shtetasit Hamza Lici, vëllai i të shumëkërkuarit Ibrahim Lici, si dhe Arlind Bushati, djali i kandidatit për kryebashkiak të Shkodrës, Xhemal Bushati.

Siç transmeton tch, më 11 tetor djali i ish-kandidatit të Partisë Demokratike për Bashkinë e Shkodrës, Xhemal Bushati, denoncoi në polici se një anëtar i fisit Bajraj, e kishte kërcënuar me armë zjarri në një lokal në pedonalen e qytetit.

Ndërkohë sot në atentatin e ndodhur në Dobraç, ku mbeti i vrarë vëllai i Ibrahim Licit, i plagosur rëndë ka mbetur Arlind Bushati, i biri i Xhemalit.

Ngjarja e rëndë dyshohet se është një përplasje mes bandave më të njohura të krimit në Shkodër, Bajrajt dhe Licët, ndërsa deri më tani thuhet se dy makina në ecje kanë nisur të shkëmbejnë plumba në drejtim të njëra-tjetrës.

Si pasojë e shkëmbimit të zjarrit, ka humbur jetën edhe një grua që kalonte rastësisht në zonë, si dhe ka mbetur i plagosur edhe një burrë, po kalimtar i rastit.