Marrëveshja e 27 shkurtit në Bruksel, Gorani: Ishte e pashmangshme, Asociacioni përbën theksin qendror të saj

Pas disa muajsh bisedime, Kosova dhe Serbia arritën darkodim për planin evropian. Këtë e bënë mbrëmjen e 27 shkurtit në Bruksel. Një marrëveshje e tillë sipas analistit Dukagjin Gorani ishte e pashmangshme.

Në një prononcim për Telegrafin, ai tha se implementimi do të dëshmojë se bëhet fjalë për jetësimin e marrëveshjeve të viteve 2013 dhe 2015, kjo pasi sipas tij, Asociacioni i komunave me shumicë serbe në Kosovë përbën theksin qendror të saj.

“Po ashtu, përfshirja e statusit të Kishës Ortodokse në këtë marrëveshje dëshmon se hartuesit e saj synuan që t’i përmbledhin të gjitha çështjet kritike që i rëndojnë marrëdhëniet me serbët e Kosovës dhe Serbinë tash e sa vjet”, deklaroi Gorani.

Lexo po ashtu “Marrëveshje drejt normalizimit mes Kosovës dhe Serbisë"- gjithçka nga takimi i “nxehtë” Kurti-Vuçiq në Bruksel ku u diskutua për propozimin e BE-së

Ai tutje u shpreh se kjo marrëveshje është dashur të mbyllet në vitin 2013 apo 2015, më së largu.

Analisti fajësoi qeveritë e kaluara që për “kalkulime politike” i humbën 10 vjet, ndërsa partinë e cila është në pushtet e që atëkohë ishte në opozitë, për “deformim të komunikimit publik”.

“U humbën kot 10 vjet në kalkulime elektorale nga ana e qeverive të kaluara, si dhe në deformim të komunikimit publik nga ana e opozitës së atëhershme që sot është në pushtet. Ky përkeqësim shkoi aq larg sa që sot, Marrëveshja e 27 shkurtit interpretohet vetëm nga prizmi grupor dhe partiak”, tha Gorani për Telegrafin.

Tani sipas tij, pak kujt i intereson përmbajtja dhe efektet e marrëveshjes; “gati të gjithë janë të fiksuar të dinë se kush do të jetë humbësi dhe fituesi elektoral i saj”.

“Kjo praktikë interpretuese është zbatuar më shumë se një dekadë dhe nuk do të ndryshojë”, përfundoi ai.

Propozimi franko-gjerman i njohur si plani evropian, i është dorëzuar Kosovës dhe Serbisë fillimisht në vjeshtën e vitit 2022.

Ky propozim parashihet t’i drejtojë palët drejt një marrëveshjeje gjithëpërfshirëse.

Propozim-marrëveshja që është bërë publike pas takimit të 27 shkurtit, përfshin zotimin e palëve për t’i respektuar të gjitha marrëveshjet e arritura deri më tani në dialogun për normalizimin e marrëdhënieve, si dhe përkushtimin e tyre për të mos e penguar njëra-tjetrën në proceset integruese.

Marrëveshjet e deritashme përfshijnë edhe atë për themelimin e Asociacionit të komunave me shumicë serbe në Kosovë, e cila është arritur në vitin 2013, por nuk është zbatuar kurrë.

Kryeministri i Kosovës, Albin Kurti thotë se në Kosovë nuk mund të ketë asociacion njëetnik me kompetenca ekzekutive, ndërsa presidenti serb, Aleksandar Vuçiq insiston në themelimin e tij. /Telegrafi/