Marcus Rashford është lojtari më i ri i Barcelonës. Sulmuesi anglez ka nënshkruar një marrëveshje huazimi për sezonin 2025/26 nga Manchester United, me një opsion blerjeje prej 30 milionë eurosh që mund të aktivizohet deri në qershor 2026 – raporton eksperti i transferimeve, Fabrizio Romano.
27-vjeçari mbërriti në Barcelonë të hënën, ku iu nënshtrua testeve mjekësore para zyrtarizimit të marrëveshjes, që do të bëhet të mërkurën.
Ky transferim shënon një kthesë të madhe në karrierën e Rashford pas një periudhe të vështirë te Manchester United, ku kishte rënë në konflikt me trajnerin Ruben Amorim dhe ishte përjashtuar nga ekipi që prej 12 dhjetorit 2024 për arsye disiplinore.
Në shkurt të vitit 2025, Rashford u huazua te Aston Villa, ku arriti të rilindte si futbollist nën drejtimin e Unai Emery.
Ai shënoi 4 gola dhe dha 6 asiste në 17 ndeshje, por Aston Villa nuk arriti të sigurojë një vend në Ligën e Kampionëve dhe nuk e aktivizoi opsionin për blerje për shkak të kufizimeve financiare.
Barcelona, e cila më parë kishte dështuar të siguronte shërbimet e Luis Díaz nga Liverpool dhe Nico Williams nga Athletic Bilbao, përfitoi nga situata për të siguruar Rashfordin – një destinacion që ishte gjithmonë i preferuar për vetë lojtarin.
Rashford ka qenë pjesë e Manchester United që nga mosha 7-vjeçare, duke realizuar 138 gola në 426 paraqitje për ekipin e parë. /Telegrafi/
