Lajme Kosovë Siguri

Maqedonci për marrëveshjen e armëve me Turqinë: Kemi pasur dritën e gjelbër nga SHBA

Para 1 muaji

Kryeministri i Kosovës, Albin Kurti, ka njoftuar se është nënshkruar kontrata me prodhuesin shtetëror turk “Makine ve Kimya Endüstrisi” (MKE), për të vënë në funksion fabrikën e municioneve në Kosovë. Pos prodhimit të dy llojeve të municioneve, në fabrikë do të bëhen edhe dizajne të dronëve luftarakë.

Ministri i Mbrojtjes, Ejup Maqedonci ka thënë se shteti i Kosovës është dakorduar dhe konsultuar vazhdimisht me Shtetet e Bashkuara të Amerikës [SHBA], ku këta të fundit kanë dhënë “dritën jeshile” për fabrikën e municioneve si ndërmarrje publike e Kosovës.

Maqedonci në “Debat Plus” ka shpalosur detaje nga marrëveshja mes Kosovës e Turqisë, ku ka deklaruar se prodhimi i municioneve do të bëhet brenda disa muajsh por që pozicionin e saktë se ku do të ndërtohet nuk e ka treguar.

“Marrëveshja e arritur sot me kompaninë prodhuese shtetërore turke, prodhuese kryesore e armëve në Turqi, është arritje e jashtëzakonshme, e në veçanti kur kemi parasysh nevojën për ndërtimin e industrisë së mbrojtjes, si kapacitet tejet i nevojshëm në situatën aktuale globale. Duke pasur parasysh mungesën e municioneve në të gjitha vendet e botës, prodhimi i tyre është arritje e madhe dhe me marrëveshjen e sotme janë hapat e parë për ndërtimin e industrisë së mbrojtjes. Brenda disa muajve do të mundësohet që kjo fabrikë të fillojë ndërtimin”, tha Maqedonci.

Maqedonci tha se në fabrikën e cila pritet të ndërtohet së shpejti, do të prodhohen municione 5.56 mm dhe 7.62 mm e që i përkasin municioneve të armëve këmbësorisë, pushkëve individuale të ushtarakëve dhe mitrolozëve.

“Pozicionin [e ndërtimit të fabrikës] nuk mundemi me bë publik. fabrika do prodhojë dy forma të municioneve, pra 5.56mm dhe 7.62mm. Janë municione të armëve këmbësorisë, pushkëve individuale të ushtarakëve dhe mitralozëve. Janë municione që shpenzohen gjatë ushtrimeve dhe operacioneve ushtarake. Makineritë që montohen në Kosovë, duke përfshirë edhe laboratorët e testimit dhe kalibrimit të qitjeve me municione, do jenë sipas standardeve të NATO-së. Do të plotësojmë nevojat e FSK-së, policisë dhe institucioneve të tjera të sigurisë. Pas do viteve edhe do eksportojmë jashtë vendit”, u shpreh Maqedonci.

Maqedonci tha se marrëveshja është e nënshkruar nën kompetencat shtet-shtet.

“Në vazhdimësi pranojmë kërkesa për investim, jo kërkesa për bashkë investim, dhe kërkesa për rregullimin e dokumentacioneve në MPB-në për lejimin e licencave të prodhimit, asnjë kompani dhe prodhues nuk është i përjashtuar. Por jemi duke folur për kontratë shtet me shtet, ndërmarrje publike që do krijohet për prodhimin e municioneve për FSK dhe institucionet e tjera të sigurisë. Me SHBA-të ne koordinohemi dhe jemi konsultuar vazhdimisht për këtë projekt, kemi pasur dritën e gjelbër”, shtoi Maqedonci.