Malcom flet për ‘tradhtinë’ që ia bëri Romës: Isha i lumtur që po i bashkohesha, por në fund vendosa ta realizoj ëndrrën e fëmijërisë për të luajtur me Barcelonën

Sulmuesi brazilian, Malcom ishte bërë njeriu më i përfolur gjatë afatit kalimtar të verës.

Anësori vendosi të largohet nga klubi francez Bordeaux dhe Roma e zyrtarizoi.

Në fakt Roma dhe klubi francez kishin arritur marrëveshje, por që në fund këta të fundit e thyen atë duke pranuar ofertën e Barcelonës.

Kishte shumë akuza si nga klubi italian ashtu edhe nga agjentët e lojtarit, ndërsa së fundmi vet Malcom ka folur për këtë temë.

“Isha shumë i lumtur që po i bashkohesha Romës, pasi kishin shprehur interesim prej kohësh për mua”.

“Por në momentin që erdhi oferta e Barcelonës, mu kujtua fëmijëria dhe ëndrra ime e madhe për të luajtur në Camp Nou”.

“Edhe prindërit më thonin gjithmonë se një ditë do të luaja për Barcelonën dhe kjo ishte arsyeja që nuk mendova dy herë për ta zgjedhur”, tha Malcom.

Braziliani fillimisht kishte vështirësi në adaptimin tek skuadra katalunase, por me të debutuar me gol në Ligën e Kampionëve ka marrë vetëbesim.

“Tani po ndihem më mirë. Kisha vështirësi por debutimi me gol në Ligën e Kampionëve më ka ndihmuar shumë”.

“Barcelona është klubi më i madh në botë dhe këtu duhet vetëm durim për t’i shfrytëzuar rastet që të jepen”, u shpreh braziliani për Bein Sport. /Telegrafi/