Luajtën edhe te Interi edhe te Juventusi, këta janë 14 ‘tradhtarët’ e ‘Derbit të Italisë’

Mungojnë pak orë nga Derbi i Italisë, mes Interit dhe Juventusit, i cili do të luhet sot në orën 18:00.

Por, sa më shumë afrohet sfida, aq më e madhe bëhet pritja mbi një takim ku historitë për t’u treguar janë pa fund, ashtu sikurse edhe polemikat dhe urrejtja mes tyre që i kanë shoqëruar për shumë dekada me radhë.

Duke parë luftën që ka ekzistuar gjithmonë mes tyre, tifozët e kishin shumë të thjeshtë që të etiketonin si tradhtarë apo mercenarë lojtarët që kanë lënë Juventusin për Interin ose anasjelltas, ku ata të 20 viteve të fundit tregohen si më poshtë.

1) Roberto Baggio

Luajti për Juven në vitet 1990-1995, përpara se në 1998 të vendoste të transferohej tek Interi, ku qëndroi deri në 2000-in.

2) Zlatan Ibrahimovic

Gjiganti suedez që u vesh bardhezi në vitet 2004-2006, vendosi të largohej në drejtim të Milanos pas “Calciopolit” dhe me zikaltrit fitoi 3 kampionate dhe 2 Superkupa Italie.

3) Fabio Cannavaro

Tek Interi nuk shkëlqeu gjatë viteve 2002- 2004. Por nga korriku 2004 e deri në 2006 u bë protagonist te Juventusi i Capellos, skuadër në të cilën do të kthehej edhe në 2009-2010.

4) Patrick Vieira

Një tjetër lojtar që torinezët e dashuruan (luajti në sezonin 2005-2006 te Juve), por nuk ngurruan ta quajnë tradhtar, teksa pas “Calciopolit” ai vendosi të luajë për 4 sezone me Interin.

5) Andrea Pirlo

Një nga pengjet e mëdha të zikaltërve, i cili nuk u vlerësua kurrë në Milano, ku luajti në sezonet 1998- 1999 dhe 2000-2001, ndërsa me Juven luajti në vitet 2011- 2015.

6) Christian Vieri

Në sezonin 1996-1997 me bluzën e Juves bota e quajti atë si sulmuesin më të fortë të globit. Por pas dy vitesh të kaluara tek Atletico dhe Lazio, Interi e transformoi në “mister 90-miliardshin”.

7) Lucio

Tek Interi në 2009- 2012 do të mbahet mend se fitoi Champions-in, ndërsa te Juventusi luajti vetëm gjashtë muaj, korrik 2012-janar 2013.

8) Hernanes

Anonim tek Interi në sezonin 2014-2015, po i tillë edhe te Juventusi në këto ditë.

9) Leonardo Bonucci

Tentoi të shpërthente te të rinjtë e Interit në vitet 2005-2007, por ata që e vlerësuan realisht ishin juventinët, aty ku luan dhe është transformuar në një lider nga 2010-ta në vazhdim.

10) Antonio Candreva

Moggi ia dhuroi Capelos në vitin 2010 si një prej talenteve të së ardhmes, por ai u largua shumë shpejt. Ndërsa sivjet Interi e pagoi 25 milionë euro.

11) Adrian Mutu

Një sulmues me perspektivë, por kaloi si një meteor nga Interi në vitin 2000 e më pas te Juvja në sezonin 2005-2006.

12) Angelo Peruzzi

Një legjendë juventine (vitet 1991- 1999), ai luajti për një sezon (1999-2000) edhe tek Interi.

13) Paulo Sousa

Fitues i Ligës së Kampioneve 1996 me Juventusin (sezonet ’94-’96), ai u rikthye në Itali në 1998, ku luajti për dy vite me Interin.

14) Cristiano Zanetti

I rritur tek Interi, ku luajti për gjashtë sezone, ai zgjodhi të kalonte në Torino në vitin 2006 te Juventusi, ku qëndroi për tre sezone.