Liverpooli do ta ketë të vështirë të nënshkruajë me Carvalhon, tani edhe skuadrat tjera e duan talentin e Fulhamit

Fabio Carvalho është njëri nga lojtarët më të talentuar në futbollin anglez.

Mesfushori ofensivë aktualisht luan te Fulham dhe gjatë janarit ishte pranë për t’iu bashkuar Liverpoolit.

Transferimi i tij në Anfield ishte punë e kryer dhe pritej vetëm zyrtarizimi, por në fund përfundoi afati kalimtar dhe kjo gjë nuk ndodhi.

The Reds kanë vazhduar bisedimet për transferimin e portugezit të natyralizuar si anglez, por transferimin e tij do ta kenë shumë të vështirë.

Mediat angleze kanë raportuar se për Carvalhon interesim kanë shprehur edhe shumë skuadra të tjera si në Angli ashtu edhe në Gjermani.

Chelsea, Arsenal, Tottenham Hotspur dhe Manchester United janë skuadrat tjera që po tentojnë transferimin e tij.

Ndërkohë edhe dy skuadrat gjermane Bayer Leverkusen dhe Borussia Dortmund gjithashtu janë në garë për transferimin e tij.

19-vjeçari ka zhvilluar 24 ndeshje me Fulham, ku ka realizuar tetë gola e ka asistuar në pesë të tjerë.

Londinezët synojnë që të përfitojnë rreth 20 milionë euro nga shitja e tij në verë. /Telegrafi/