Libri i gazetarëve të Washington Post thotë se Trump donte të dërgonte në Guantanamo, amerikanët e infektuar me COVID-19

Ish-presidenti Donald Trump konsideroi dërgimin e shtetasve amerikanë të infektuar me coronavirus në Gjirin Guantanamo, sipas një libri të ri.

“A nuk kemi një ishull që zotërojmë?”, citohet të ketë pyetur Trump stafin në “Situation Room” në shkurt të vitit 2020, njoftoi Washington Post. “Po në Guantanamo?”.

Gjiri Guantanamo është një kamp paraburgimi në Kubë që SHBA përdor për të strehuar ata që akuzohen për krime të rënda, duke përfshirë luftëtarë armiq nga luftërat e huaja dhe ata që dyshohet se qëndrojnë pas sulmeve të 11 Shtatorit.

“Ne importojmë mallra”, është shkruar në libër të ketë thënë Trump para stafit të tij, i cili më vonë u prek nga COVID-19. “Ne nuk do të importojmë një virus”.

Dhe siç vënë në pah mediat e huaja, përcjell Telegrafi, komentet erdhën para se rastet e coronavirusit të shpërthejnë në SHBA dhe Administrata e Trump u përball me kritika për trajtimin e pandemisë, e cila ka vrarë më shumë se 601,000 njerëz, sipas vlerësimeve të Universitetit Johns Hopkins.

Shumica e atyre vdekjeve, afërsisht 400,000, ndodhën në kohën kur SHBA-atë administroheshin nga Trump.

Por siç ka raportuar WP, ndihmësit e Trump u habitën nga pyetja në lidhje me Gjirin Guantanamo dhe e mbyllën idenë herën e dytë që u ngrit.

Libri, i titulluar Skenari i Makthit: Brenda përgjigjes së administratës Trump ndaj Pandemisë që ndryshoi historinë, u shkrua nga gazetarët e WP, Yasmeen Abutaleb dhe Damian Paletta.

Përmbajtja e librit thuhet se erdhi nga intervistat me ish-këshilltarët e lartë të Trump dhe zyrtarë shëndetësorë, duke rrëfyer biseda të shumta që përshkruajnë reagimin e administratës Trump ndaj pandemisë. /Telegrafi/