Lëvizja Besa: Qeveria dështon në lidhje me Ligjin për përdorimin e gjuhës shqipe

Partia opozitare, Lëvizja Besa ka reaguar deri tek qeveria, për mungesën e reformave dhe mos zbatimin e ligjeve që u dakorduan me këtë parti, duke përmendur këtu edhe ligjin për përdorimin e gjuhës shqipe, njofton Telegrafi Maqedoni.

“Qeveria aktuale jo vetëm që nuk po arrin të futë në procedurë parlamentare ligjet të cilat i ka dakorduar me Lëvizjen Besa, gjatë ndryshimeve të fundit kushtetuese, por po kjo Qeveri LSDM-BDI, po dështon edhe në implementimin e ligjit për përdorimin e gjuhës shqipe” thonë nga kjo parti.

“Pas njoftimeve të djeshme të zv.sekretarit të Qeverisë, që vjen nga rradhët e BDI-së, se Qeveria ende nuk ka formuar Inspektoratin Shtetëror, institucion ky i cili do duhet të bëjë përcjellje instuticionale të implementimit të gjuhës shqipe konform ligjit të cilit ka dhënë mbështetje edhe Lëvizja Besa” vazhdojnë nga Lëvizja Besa.

“Shtrohet pyetja, se me çka merren përfaqësuesit shqiptarë në qeveri, BDI-ja dhe partitë e tjera, kur edhe pas gjashtë muajve nuk po arrijnë të krijojnë institucionin kryesor i cili do bëjë inspektimin e përdorimit të gjuhës shqipe në nivel qendror dhe lokal, ndërsa në anën tjetër për çdo ditë kemi me qindra shembuj të bastardimit të gjuhës shqipe, mos përdorimi i duhur si dhe shkelje që kanë të bëjnë me përdorimin e të njejtit” thonë mes tjerash nga partia opozitare.

“Për fat të keq, po dëshmohet se edhe kjo qeveri si ajo e kaluara që kanë emëruesin e përbashkët BDI-në, nuk kanë kapacitet për të punuar në mbrojtjen dhe avancimin e të drejtave të shqiptarëve, prandaj zgjidhja e vetme e cila do kristalizojë skenën politike janë zgjedhjet e parakohshme, me ç’rast jemi të bindur se opozita shqiptare do jetë fitues absolut dhe përfaqësues i denjë i shqiptarëve në Maqedoninë e Veriut” përfundojnë nga Lëvizja Besa. /Telegrafi/