Letra e liderëve drejtuar raportueses Bakoyannis, Haradinaj zbardh disa citate: Zotimet e dhëna shumë të mëdha dhe obligime konkrete

Lideri i Aleancës për Ardhmërinë e Kosovës, Ramush Haradinaj ka reaguar lidhur me letrën që tre liderët shtetërorë i kanë dërguar raportueses për Kosovën në Këshill të Evropës, Dora Bakoyannis.

Haradinaj në një postim në Facebook shkruan se e kuptueshme që letra e tre krerëve shtetëror dërguar raportueses së KiE, Dora Bakoyannis mund të jetë standard para aplikimit për anëtarësim në Këshillin e Evropës, por kurrsesi nuk mund të cilësohet formalitet, siç e quan pushteti, sepse gama e zotimeve në atë letër është shumë e gjerë dhe përfshinë obligime konkrete.

“Ata zotohen se do të zbatojnë të gjitha nenet e marrëveshjeve të Brukselit e Ohrit, duke përfshirë edhe Asociacionin. Pyetja është, pse kanë pasur nevojë që deri me tash ta zhagisin zbatimin e kësaj marrëveshjeje e të thonë herë e zbatojmë herë nuk e zbatojmë.

P.sh. thuhet se liderët institucionalë zotohen se ‘do të respektohet pavarësia e gjyqësorit dhe do të hiqet dorë nga ‘kritikat e tepruara ndaj gjyqësorit’. Kjo d.m.th se këta zotohen të heqin dorë nga diçka që e kanë aplikuar deri me tash”, thekson Haradinaj.

“Aty thuhet ‘Të përmbahemi nga përdorimi i policisë speciale në veri të Kosovës për detyra të zakonshme policore e të sigurohemi se ato dislokohen vetëm në rast nevoje’, që i bjen se deri më tash nuk e kanë zbatuar këtë standard që aq shpesh është kërkuar nga aleatët tanë”, shkruan tutje Haradinaj.

“Zotohen për shpronësimet në veri; Për mbrojtjen e pronave të Kishës Ortodokse Serbe; Për integrimin e pakicave; për gjuhët e tyre, shkollimin tekstet … e kështu me radhë.

Anëtarësimi i Kosovës në Këshillin e Evropës është ngjarje e madhe dhe hap i rëndësishëm drejt integrimit në BE dhe ndoshta letra e zotimeve drejtuar Bakojanis përfshihet në këtë kuadër, por është e habitshme se si liderët institucionalë të Kosovës, deri me tash kanë shpërfillur kërkesat e njëjta nga nivele shumë të larta të ShBA dhe BE, dhe pikërisht për këtë sot jemi edhe nën sanksione, edhe në marrëdhënie shumë të acaruara me ShBA e BE, edhe të detyruar t’i përsërisim zgjedhjet në veri, edhe të merremi me dinarin, edhe në pozitën më të keqe të mundshme në procesin e dialogut me Serbinë”, shkruan lideri i AAK-së. /Telegrafi/