LDK-ja nuk i tregon arsyet e dorëheqjes së nënkryetares Mjekiqi

Lidhja Demokratike e Kosovës (LDK) nuk i ka treguar arsyet e dorëheqjes së nënkryetares së saj, Shqipe Mjekiqi. Ajo nuk ka përmendur arsyet e vendimit të saj në letrën e dorëheqjes, kurse nuk ka qenë e qasshme për të dhënë më shumë informacione.

Nga e marta, Lidhja Demokratike e Kosovës ka një nënkryetare më pak.

Por, partia më e vjetër në Kosovë nuk ka treguar arsyet që çuan Shqipe Mjekiqin të dorëhiqej nga kjo pozitë dhe ajo e anëtares së kryesisë.

LDK-ja nuk u është përgjigjur pyetjeve të Dukagjinit për këtë çështje.

E pa qasshme gjatë tërë ditës ka qenë edhe vet Mjekiqi, e cila në letrën e dorëheqjes nuk ka treguar arsyet e vendimit të saj.

Arsyet e dorëheqjes nuk i di as nënkryetari i partisë, Gazmend Muhaxheri.

Mirëpo, ai thotë se vendimi i Mjekiqit i ka befasuar të gjithë.

Lexo po ashtu Dorëheqjet në LDK, Sibel Halimi mohon se është larguar nga partia

“Jo nuk e di, edhe jam i befasuar si krejt të tjerët. I kemi pasur raportet shumë të mira me nënkryetare, por nuk e kam as idenë”, ka thënë Muhaxheri.

Në media është raportuar se dorëheqje ka dhënë edhe zëdhënësja e LDK-së, Sibel Halimi.

Por, në një reagim në Facebook ka mohuar se është dorëhequr nga partia, mirëpo nuk ka treguar nëse do të vazhdojë të jetë akoma zëdhënëse.

As Halimi nuk i është përgjigjur insistimit të televizionit.

Ky zhvillim brenda LDK-së, sipas analistit politik Artan Muhaxhiri, meriton shpjegim nga ana e partisë.

Muhaxhiri thotë se mos transparenca dëmton imazhin e LDK-së, e cila synon që në të ardhëm të marrë drejtimin e vendit.

Ndryshimet e fundit në LDK u bënë në mars të vitit 2021 kur Lumir Abdixhiku mori drejtimin e partisë, pas dorëheqjes së Isa Mustafës.

Më pas, Abdixhiku krijoi ekipin e tij me disa figura të reja, duke lënë jashtë disa prej bashkëpunëtorëve të ish-kryetarit Mustafa./RTV Dukagjini/