Gjatë seancës së fundit të Kuvendit Komunal të Gjilanit, asamblistët kanë shfuqizuar disa vendime që lidhen me mbështetjen financiare të shoqatave dhe individëve në nevojë.
Në mesin e vendimeve të anuluara janë ato për sigurimin e shujtave për shërbyesit civilë, si dhe ndarja e fondeve për Shoqatën e të Verbërve, Handikos, Down Syndrome Kosova – dega në Gjilan, shoqatën "Pema", si dhe ndihmat financiare për qytetarët Isme Baftiu dhe Besim Jashari(dy individë të cilët kanë përfituar ndihmë financiare nga Kuvendi Komunal i Gjilanit).
Këto vendime janë cilësuar si të kundërligjshme nga Ministria e Administrimit të Pushtetit Lokal (MAPL).
Në këtë kontekst, Kuvendi i Komunës ka rekomanduar drejtorive komunale që të veprojnë me shpejtësi për shpalljen e thirrjeve publike, në përputhje me udhëzimet administrative në fuqi.
Në këtë mënyrë, mjetet e ndara për këto kategori do të barten në kategorinë e subvencioneve, duke siguruar që ndihma për shoqatat dhe individët e prekur të vazhdojë në mënyrë të rregullt dhe të ligjshme. /Telegrafi/
