Kryeministri Haradinaj vendos kurora lulesh në varrin e Otto von Habsburg

Kryeministri Ramush Haradinaj gjatë qëndrimit zyrtar në Vjenë të Austrisë, sot ka vendosur kurora lulesh në varrin e princit Otto von Habsburg.

Ky nderim i kryeministri Haradinaj për ta vizituar varrin e Otto von Habsburg përkon me rastin e ditëlindjes së këtij të fundit.

Sipas kumtesës për media, kryeministri Haradinaj tha se Otto von Habsburg i kushtoi jetën e tij integrimit evropian duke u bërë një nga evropianët më të mëdhenj të shekullit të 20-të, që i dha rëndësi projektit të integrimit evropian në një kohë kur kontinenti ishte i mbushur me pasojat e mjerueshme ekonomike dhe politike të Luftës së Dytë Botërore, derisa në historinë e shqiptarëve kishte një rol të veçantë.

“Marrëdhëniet historike mes popullit tonë dhe Habsburgëve kanë rezultuar me një përkrahje të ndërsjellë. Veçmas ngjarja historike në vitin 1914 dhe ajo që pasoi, ka rezultuar që për ne me kriju shumë më shumë hapësirë me u ndje më të lirë”, tha Kryeministri Haradinaj, duke shtuar se Habsburg ishte përkrahës i madh i përpjekjeve të shqiptarëve për pavarësi.