KQZ i heq mandatin kryebashkiakut Agim Kajmaku, reagon Edi Rama

Komisioni Qendror i Zgjedhjeve ka vendosur t’i heqë mandatin kryebashkiakut të Vorës, Agim Kajmaku

Të pestë anëtarët e KQZ kanë votuar në unanimitet për t’i hequr mandatin Kajmakut.

Pas vendimit të marrë, kryetari i KQZ, Klement Zguri tha se ky vendim duhet ti komunikohet kryeministrit dhe më pas të botohet në fletoren zyrtare. Kundër këtij vendimi mund të bëhet ankimim brenda 45 ditëve në Gjykatën Administrative.

Për këtë vendim ka reaguar edhe kryeministri Rama, i cili tha” Institucionet janë institucione”.

Shkarkimi i Kajmakut u bë pas kërkesës së prokurorisë, e cila duke iu referuar përgjigjeve të Interpol kërkoi shkarkimin e të zgjedhurit në 30 qershor.

Kajmaku u denoncua nga Partia Demokratike, që sipas saj ai ka mbajtur emrin Jorgo Toto në Greqi dhe është ndaluar në vitin 2003 për falsifikim kartëmonedhash. Sipas PD, kryebashkiaku ka pasur dijeni të plotë edhe se ka qenë në kërkim ndërkombëtar, por këto të dhëna nuk i ka pasqyruar në formularin e dekriminalizimit./oranews/