Konsumatorët janë detyruar të kalojnë natën në IKEA për shkak të reshjeve të borës në Danimarkë

Gjashtë klientëve dhe 25 punonjësve të IKEA-s iu desh të kalonin natën në shtretër dhe divane në dyqanin e mobiljeve për shkak të një reshje të madhe bore në Danimarkë të mërkurën në mbrëmje, sipas transmetuesit publik DR.

Sipas mediave të huaja, përcjell Telegrafi, imazhet treguan njerëzit e bllokuar të ulur së bashku duke pirë birra, kafe dhe jo vetëm ndërsa shikonin futboll në rajonin e Jutlandës Veriore, rreth qytetit të Aalborg.

“Të gjithë ishin kaq të ëmbël, dhe ne në fakt thjesht qeshnim me situatën sepse ndoshta nuk do ta përjetojmë më”, ka thënë Michelle Barrett, një klient, për DR të enjten në mëngjes.

Pjesë të mëdha të Danimarkës, përfshirë kryeqytetin Kopenhagen, janë prekur nga problemet e trafikut, problemet me trenat dhe ndërprerjet e përkohshme të energjisë elektrike për shkak të stuhisë së borës.

Gjithashtu, në aeroportin e Aalborg, rreth 300 njerëz u desh të prisnin me durim gjatë natës për shkak të stuhisë së borës.

Siç raportohet, edhe në vende të tjera të vendit ka pasur probleme gjatë natës. /Telegrafi/