Konferenca ndërqeveritare, KE nuk konfirmon mbajtjen e saj me Shqipërinë në qershor

Raportimet se konferenca e parë ndërqeveritare me Shqipërinë për negociatat e anëtarësimit do të mbahet në muajin qershor, Komisioni Evropian nuk i konfirmoi, por bëri të qartë se Tirana dhe Shkupi nuk do të ndahen në procesin e integrimit.

“Ajo që mund t’iu them është se, siç e kemi përsëritur shpeshherë, presim me padurim mbajtjen e konferencës së parë ndërqeveritare me Shqipërinë dhe Maqedoninë e Veriut sa më shpejt që të jetë e mundur. Ky është një pozicion shumë i qartë nga ana e Komisionit Evropian”, deklaroi Ana Pisonero, zëdhënëse e Komisionit Evropian

Ajo bëri të ditur dhe hapat që duhen bërë që të niset me hapjen e kapitujve të parë të anëtarësimit në BE me Shqipërinë dhe Maqedoninë e Veriut.

“Që kjo të ndodhë, Këshilli duhet të dakordohet për kornizën e negociatave, për të cilën Komisioni e ka dërguar shumë kohë më parë propozimin e tij. Ndaj jemi në këtë pikë, Komisioni Evropian pret që presidenca të gjejë një kohë të përshtatshme për të mbajtur konferencën e parë sa më shpejt me të dyja shtetet”, vijoi ajo.

Në të njëjtën linjë edhe Gjermania, që nuk pranon ndarjen e Tiranës dhe Shkupit në procesin e integrimit. Për ministrin e Jashtëm gjerman, Heiko Maas, “në të kaluarën këto vende nuk janë ndarë dhe ka qenë në rregull. Ne mbështesim presidencën portugeze që të gjejë sa më shpejt zgjidhje për çështjet dypalëshe, në mënyrë që të hapen sa më shpejt konferencat e anëtarësimit, si për Maqedoninë e Veriut, ashtu edhe për Shqipërinë. Nuk mendojmë t’i ndajmë nga njëra-tjetra”.

Zgjedhjet parlamentare dhe raporti i OSBE/OHDIR për mbarëvajtjen e procesit pritet të kenë një ndikim të konsiderueshëm lidhur me mbajtjen e konferencës së parë ndërqeveritare të BE me Shqipërinë./A2